Chennai , May 8 : தவெகவுக்கு கைகொடுக்கிறதா CPM-CPI?.. விஜய் ஆட்சி அமைக்க ஆளுநர் சந்திப்பு.. தமிழக அரசியலில் பரபரப்பு திருப்பம்
தமிழக அரசியலில் கடந்த சில நாட்களாக உருவாகி வரும் பரபரப்பான சூழ்நிலையில், Vijay தலைமையிலான தமிழக வெற்றி கழகம் ஆட்சி அமைப்பதற்கான தீவிர அரசியல் நகர்வுகளில் ஈடுபட்டு வருவதாக வெளியாகும் தகவல்கள் பெரும் கவனத்தை ஈர்த்துள்ளன. குறிப்பாக CPM மற்றும் CPI ஆகிய இரு கம்யூனிஸ்ட் கட்சிகளும் தவெகவுக்கு வெளியிலிருந்து ஆதரவு அளிக்கக்கூடும் என்ற தகவல் தமிழக அரசியலில் புதிய திருப்பத்தை உருவாக்கியுள்ளது.
தொடர்ச்சியாக கடந்த மூன்று நாட்களாக பல்வேறு கட்சிகளின் சட்டமன்ற உறுப்பினர்களை சந்தித்து ஆதரவை திரட்டும் பணிகளில் தவெக நிர்வாகிகள் தீவிரமாக செயல்பட்டு வருவதாக கூறப்படுகிறது. இந்த முயற்சியின் ஒரு பகுதியாக IUML கட்சியினருடனும் பேச்சுவார்த்தை நடைபெற்றதாக தகவல்கள் வெளியாகியுள்ளன. ஆனால் “திமுக என்ன முடிவு எடுக்கிறதோ அதன்படி செயல்படுவோம்” என்ற நிலைப்பாட்டை அவர்கள் தெரிவித்ததாக கூறப்படுகிறது.
தற்போது அரசியல் வட்டாரங்களில் அதிகம் பேசப்படுவது CPM மற்றும் CPI கட்சிகளின் முடிவுதான். இரு கட்சிகளும் தனித்தனியாக ஆலோசனைக் கூட்டங்களை நடத்தி தங்களது நிலைப்பாட்டை இறுதிப்படுத்தும் பணிகளில் ஈடுபட்டுள்ளதாக தகவல்கள் தெரிவிக்கின்றன.
அரசியல் வட்டாரங்களில் வெளியாகும் தகவல்களின் படி, மார்க்சிஸ்ட் கம்யூனிஸ்ட் கட்சி வெளியிலிருந்து ஆதரவு அளிக்கும் முடிவை நோக்கி நகர்ந்து வருவதாக கூறப்படுகிறது. அதேபோல் இந்திய கம்யூனிஸ்ட் கட்சியிலும் தவெகவுக்கு தார்மீக அடிப்படையில் ஆதரவு வழங்க வேண்டும் என்ற மனநிலை அதிகரித்துள்ளதாக அரசியல் ஆய்வாளர்கள் தெரிவிக்கின்றனர். “இந்த சூழலில் ஆதரவு வழங்காமல் தாமதித்தால் அது நியாயத்தின் பக்கம் நிற்காத அரசியல் என்ற விமர்சனம் உருவாகலாம்” என்ற கருத்தும் கம்யூனிஸ்ட் வட்டாரங்களில் பேசப்பட்டதாக தகவல்கள் வெளியாகியுள்ளன.
தமிழக வெற்றி கழகத்தின் அடுத்த முக்கியமான அரசியல் நகர்வாக ஆளுநரை சந்திக்கும் திட்டம் பார்க்கப்படுகிறது. மாலை 4.30 மணியளவில் விஜய் ஆளுநர் மாளிகைக்கு செல்லக்கூடும் என்ற தகவல் வெளியாகியிருப்பது அரசியல் பரபரப்பை மேலும் அதிகரித்துள்ளது. ஏற்கனவே தவெக நிர்வாகிகள் தொடர்ந்து கம்யூனிஸ்ட் கட்சி அலுவலகங்களுக்கு சென்று ஆதரவு கோரி பேச்சுவார்த்தை நடத்தி வருகிறது. நேற்றும் இன்றும் தொடர்ச்சியாக நடைபெற்ற இந்த சந்திப்புகள், அரசியல் மாற்றத்திற்கான முன்னோட்டமாக பார்க்கப்படுகின்றன.
கம்யூனிஸ்ட் கட்சிகளுக்கு இது வரலாற்று வாய்ப்பா?
1967ஆம் ஆண்டு முதல் திமுக மற்றும் அதிமுக கூட்டணிகளில் மாறி மாறி இடம்பெற்று வந்த கம்யூனிஸ்ட் கட்சிகளுக்கு, ஆட்சியில் நேரடி செல்வாக்கு செலுத்தும் வாய்ப்பு பெரிதாக அமையவில்லை. ஆனால் தற்போதைய அரசியல் சூழலில், தவெக ஆட்சி அமைக்கும் நிலை உருவானால், அவர்கள் அரசியல் முக்கியத்துவம் புதிய கட்டத்தை அடையக்கூடும் என்ற கருத்து உருவாகியுள்ளது.
