திருப்பூர் ,ஏப்ரல் 14 : தமிழக வெற்றிக் கழகத்தின் தலைவர் விஜய், கொங்கு மண்டலத்தின் தொழில் தலைநகரமான திருப்பூரில் நடைபெற்ற பிரம்மாண்ட பொதுக்கூட்டத்தில் பல்வேறு அதிரடித் தேர்தல் வாக்குறுதிகளை வெளியிட்டு அரசியல் வட்டாரங்களை உற்றுநோக்க வைத்துள்ளார். தொழில்முனைவோர், நெசவாளர்கள், விவசாயிகள் மற்றும் அரசுப் பணியாளர்களைக் குறிவைத்து, கொங்குப் பகுதியின் வாழ்வாதாரப் பிரச்சினைகளை நேரடியாகத் தொடும் வகையில் இந்த அறிவிப்புகள் அமைந்துள்ளன.
முக்கியமாக, திருப்பூர் மற்றும் கோயம்புத்தூர் மாவட்டங்களின் முதுகெலும்பாக விளங்கும் நெசவுத் தொழிலை மீட்டெடுக்க உலகளாவிய இ-காமர்ஸ் தளத்தை (e-commerce platform) அரசு சார்பிலேயே உருவாக்கி, அதன் மூலம் நெசவாளர்களின் தயாரிப்புகளைச் சர்வதேச சந்தைக்குக் கொண்டு செல்ல வழிவகை செய்யப்படும் என விஜய் உறுதியளித்தார். மேலும், முக்கிய நகரங்களில் அரசு சார்பில் பிரத்யேகக் காட்சி அரங்குகள் (Showrooms) அமைக்கப்படும் என்றும், நெசவாளர்களுக்கு ஆண்டுக்கு ரூ. 30,000 நேரடி நிதி உதவியுடன், அவர்கள் உற்பத்திக்குத் தேவையான நூல் மற்றும் சாயங்களுக்கு 50 சதவீத மானியம் வழங்கப்படும் என்றும் அறிவித்தார். இவற்றுடன், நெசவாளர்களுக்கான இலவச மின்சார அளவு உயர்த்தப்படும் என்றும், ரூ. 10 லட்சம் மதிப்பிலான ஆயுள் காப்பீட்டுத் திட்டம் மற்றும் மாதாந்திர ஓய்வூதியம் ரூ. 3,000 ஆக உயர்த்தப்படும் என்ற வாக்குறுதிகளையும் அவர் அடுக்கினார்.
விஜய் பிரச்சார வாகனத்தில் நிகழ்ந்த சுவாரசியம்: திருமணப் படத்தை வாங்கிய காட்சி
அடுத்ததாக, தமிழகப் பொருளாதாரத்தின் என்ஜினாகச் செயல்படும் குறு, சிறு மற்றும் நடுத்தரத் தொழில் நிறுவனங்களின் (MSME) நீண்ட நாள் கோரிக்கைகளுக்கு விஜய் தனது உரையில் முக்கியத்துவம் அளித்தார். தொழில் நிறுவனங்களை முடக்கி வரும் ‘பீக் ஹவர்’ (Peak hour) கூடுதல் மின் கட்டண முறை முற்றிலும் ரத்து செய்யப்படும் என்றும், புதிய மற்றும் தற்போதைய நிறுவனங்களுக்கு 5 ஆண்டுகள் மின்சார வரி விலக்கு அளிக்கப்படும் என்றும் அவர் கூறினார். மேலும், MSME துறையினரின் நிதி நெருக்கடியைச் சமாளிக்க ரூ. 15,000 கோடி மதிப்பில் ‘மாநில கடன் உத்தரவாத நிதி’ (State Credit Guarantee Fund) உருவாக்கப்படும் என்றும், தொழில்களை நவீனமயமாக்க விரும்புவோருக்கு ரூ. 50 லட்சம் வரை 35 சதவீத மானியம் வழங்கப்படும் என்றும் அறிவித்தார். திருப்பூரின் ஏற்றுமதி வர்த்தகத்தை மீண்டும் பழைய நிலைக்குக் கொண்டு வர இந்த அறிவிப்புகள் பெரிதும் உதவும் எனப் பொருளாதார வல்லுநர்கள் கருதுகின்றனர்.
கிராமப்புற மற்றும் டெல்டா வாக்காளர்களைக் கவரும் நோக்கில், விவசாயத் துறைக்கான மெகா கடன் தள்ளுபடித் திட்டத்தையும் விஜய் முன்வைத்தார். ஐந்து ஏக்கருக்கும் குறைவாக நிலம் வைத்துள்ள சிறு, குறு விவசாயிகளின் விவசாயக் கடன்கள் முழுமையாகத் தள்ளுபடி செய்யப்படும் என்றும், ஐந்து ஏக்கருக்கு மேல் வைத்துள்ள விவசாயிகளுக்கு 50 சதவீதக் கடன்கள் தள்ளுபடி செய்யப்படும் என்றும் உறுதியளித்தார். குறிப்பாக, பயிர்களுக்கான குறைந்தபட்ச ஆதரவு விலைக்குச் (MSP) சட்டபூர்வ உத்தரவாதம் அளிக்கப்படும் எனக் குறிப்பிட்ட அவர், நெல் குவிண்டாலுக்கு ரூ. 3,500 மற்றும் கரும்பு டன்னுக்கு ரூ. 4,500 ஆக விலை நிர்ணயம் செய்யப்படும் என்றார். இதனுடன் விவசாயிகளுக்கு ஆண்டுக்கு ரூ. 10,000 நேரடி நிதியுதவி மற்றும் 100 சதவீதப் பயிர் காப்பீட்டுத் திட்டமும் தவெக ஆட்சியில் செயல்படுத்தப்படும் எனத் தெரிவித்தார்.
அரசு ஊழியர்கள் மற்றும் காவல்துறையினரின் நலன்களைப் பாதுகாக்கும் வகையில், பல ஆண்டுகளாகத் தொடரும் பழைய ஓய்வூதியத் திட்டம் (OPS) மீண்டும் கொண்டு வரப்படுவது குறித்துப் பரிசீலிக்கப்படும் என்றும், ஐந்து ஆண்டுகள் தற்காலிகமாகப் பணியாற்றிய அனைத்து அரசு ஊழியர்களும் பணி நிரந்தரம் செய்யப்படுவார்கள் என்றும் விஜய் வாக்குறுதி அளித்தார்.
காவல்துறையினரின் பணிச்சுமையைக் கருத்தில் கொண்டு, காவலர்களின் ஆரம்பக் கட்ட அடிப்படைச் சம்பளம் ரூ. 25,000 ஆக உயர்த்தப்படும் என்றும், கூடுதல் பணி நேரத்திற்காக மாதம் ரூ. 1,000 சிறப்புப் படி (Allowance) வழங்கப்படும் என்றும் தெரிவித்தார். மேலும், காவலர்களின் உரிமைகளை உறுதி செய்ய ‘காவலர் நலச் சட்டம்’ (Police Welfare Act) கொண்டு வரப்பட்டு வாராந்திர விடுமுறை கட்டாயமாக்கப்படும் என்றும், பெண் காவலர்களுக்குப் பணியிடங்களில் தனி வசதிகள் மற்றும் கூடுதல் பாதுகாப்பு நடைமுறைகள் உருவாக்கப்படும் என்றும் உரையாற்றினார்.
திருப்பூர், கோவை, சேலம் உள்ளிட்ட கொங்கு மண்டல மாவட்டங்களின் அரசியல் கணக்குகளை மாற்றியமைக்கும் நோக்கில் வெளியிடப்பட்டுள்ள இந்த வாக்குறுதிகள், தேர்தல் குகையில் பெரும் தாக்கத்தை ஏற்படுத்தும் என எதிர்பார்க்கப்படுகிறது. தனது உரையின் நிறைவாக, வரவிருக்கும் தேர்தல் சாதாரணத் தேர்தலாக இருக்கக் கூடாது என்றும், அது ஒரு ‘விசில் புரட்சித் தேர்தல்’ ஆக மாற வேண்டும் என்றும் கூறி விஜய் மக்களிடம் தவெக-விற்கான ஆதரவைக் கோரினார்.
