விழுப்புரம் , May 30: அதிமுகவில் ஏற்பட்டுள்ள உட்கட்சிப் பூசலின் தொடர்ச்சியாக, விழுப்புரத்தில் உள்ள மாவட்ட அதிமுக அலுவலகச் சாவி புதிய மாவட்டச் செயலாளர் பசுபதி தரப்பிடம் ஒப்படைக்கப்பட்டது. இதனைத் தொடர்ந்து, அலுவலகத்திலிருந்த முன்னாள் அமைச்சர் சி.வி.சண்முகத்தின் பேனர்களை அகற்றிய புதிய நிர்வாகிகள், அங்கு சிறப்புப் பூஜைகள் செய்து முறைப்படி அலுவலகத்தைக் கைப்பற்றினர்.
அதிமுகவில் கடந்த சில வாரங்களாகவே எடப்பாடி பழனிசாமி ஒரு தரப்பாகவும், சி.வி.சண்முகம் மற்றும் எஸ்.பி.வேலுமணி ஆகியோர் மற்றொரு தரப்பாகவும் செயல்பட்டு வருகின்றனர். அண்மையில் தமிழக சட்டமன்றத்தில் தமிழக வெற்றிக் கழகத்தின் (தவெக) தலைவர் விஜய் தனது பெரும்பான்மையை நிரூபிப்பதற்காக நடைபெற்ற நம்பிக்கை வாக்கெடுப்பில், எடப்பாடி பழனிசாமியின் முடிவுக்கு மாறாக சி.வி.சண்முகம் தரப்பினர் விஜய்க்கு ஆதரவாக வாக்களித்தனர். இச்சம்பவம் அதிமுக வட்டாரத்தில் பெரும் பரபரப்பை ஏற்படுத்திய நிலையில், கட்சி ஒழுங்கை மீறியதாகக் கூறி சி.வி.சண்முகம் மற்றும் விஜயபாஸ்கர் ஆகியோரை மாவட்டச் செயலாளர் உள்ளிட்ட அனைத்துக் கட்சிப் பொறுப்புகளிலிருந்தும் எடப்பாடி பழனிசாமி அதிரடியாக நீக்கினார்.
இதனைத் தொடர்ந்து, விழுப்புரம் மாவட்ட அதிமுகவின் புதிய மாவட்டச் செயலாளராக பசுபதி நியமிக்கப்பட்டார். புதிய பொறுப்பை ஏற்ற பசுபதி தரப்பினர், விழுப்புரத்தில் உள்ள மாவட்டக் கட்சி அலுவலகத்தைத் தங்களது கட்டுப்பாட்டுக்குள் கொண்டு வர முயன்றனர். இதற்காகக் கட்சி அலுவலகத்தின் சாவியைத் தங்களிடம் ஒப்படைக்கக் கோரி விழுப்புரம் மாவட்டக் காவல் கண்காணிப்பாளர் (எஸ்பி) அலுவலகத்தில் பசுபதி தரப்பில் மனு அளிக்கப்பட்டது. எனினும், நீண்ட காலமாகத் தங்கள் வசம் இருந்த அலுவலகச் சாவியைத் தர சி.வி.சண்முகம் தரப்பினர் கடுமையான மறுப்புத் தெரிவித்து வந்தனர். இதனால் இரு தரப்பிற்கும் இடையே மோதல் போக்கு நீடித்து வந்தது.
also read : அரசு மருத்துவமனையில் தந்தையை அனுமதித்த அமைச்சர் மதன்ராஜா: நெல்லையில் கூறிய நெகிழ்ச்சி வார்த்தைகள்
இந்தச் சாவி விவகாரம் தொடர்பாக இரு தரப்பினருக்கும் இடையே நிலவி வந்த சட்டம் ஒழுங்குப் பிரச்சினையைத் தீர்க்கும் பொருட்டு, விழுப்புரம் வருவாய் கோட்டாட்சியர் அலுவலகத்தில் சமாதானப் பேச்சுவார்த்தைக்கு ஏற்பாடு செய்யப்பட்டது. வருவாய் கோட்டாட்சியர் முருகேசன் தலைமையில் நடைபெற்ற இந்தப் பேச்சுவார்த்தையில், சி.வி.சண்முகம் தரப்பும், புதிய மாவட்டச் செயலாளர் பசுபதி தரப்பும் பங்கேற்றன. அப்போது, இந்த அலுவலகக் கட்டிடம் மற்றும் அதன் உரிமை தங்களுக்குத்தான் சொந்தம் என்பதற்கான பல்வேறு ஆவணங்களையும் கோப்புகளையும் இரு தரப்பினரும் வருவாய் கோட்டாட்சியரிடம் சமர்ப்பித்து வாதிட்டனர்.
இரு தரப்பிலும் தாக்கல் செய்யப்பட்ட ஆவணங்களை விரிவாக ஆராய்ந்த வருவாய் கோட்டாட்சியர் முருகேசன், தற்போதைய தலைமை அங்கீகரித்துள்ள புதிய மாவட்டச் செயலாளர் பசுபதி தரப்பிடமே கட்சி அலுவலகச் சாவியை ஒப்படைக்க வேண்டும் என்று உத்தரவிட்டார். இந்த உத்தரவின் அடிப்படையில், அதிமுக அலுவலகத்தின் சாவியைப் பாதுகாத்து வந்த பாதுகாவலர் குணா, இன்று முறைப்படி சாவியைப் புதிய மாவட்டச் செயலாளர் பசுபதி தரப்பிடம் ஒப்படைத்தார்.
சாவியைப் பெற்றுக்கொண்ட பசுபதி மற்றும் அவரது ஆதரவாளர்கள் உடனடியாகப் பெரும் திரளாக விழுப்புரம் அதிமுக அலுவலகத்திற்கு விரைந்தனர். நீண்ட நாட்களாகப் பூட்டிக்கிடந்த அலுவலகத்தைத் திறந்து உள்ளே சென்ற அவர்கள், முதலில் அலுவலக வளாகம் முழுவதையும் தூய்மைப்படுத்தும் பணிகளில் ஈடுபட்டனர். அப்போது, கடந்த காலத்தில் சி.வி.சண்முகத்தின் ஆதரவாளர்களால் கட்சி அலுவலகத்தின் உள்ளேயும் வெளியேயும் வைக்கப்பட்டிருந்த சி.வி.சண்முகத்தின் உருவம் பொறித்த பெரிய பேனர்கள் மற்றும் புகைப்படங்கள் அனைத்தையும் பசுபதியின் ஆதரவாளர்கள் அங்கிருந்து அப்புறப்படுத்தினர்.
அலுவலகம் முழுமையாகச் சுத்தப்படுத்தப்பட்டதைத் தொடர்ந்து, புதிய மாவட்டச் செயலாளர் பசுபதி தனது ஆதரவு நிர்வாகிகளுடன் கட்சி அலுவலகத்திற்குள் சென்றார். அங்குள்ள கடவுள் வழிபாட்டு அறையில் வைக்கப்பட்டிருந்த இறைவனின் திருவுருவப் படங்களுக்குச் சிறப்புப் பூஜைகள் செய்யப்பட்டு, தீபாராதனை காட்டி வழிபாடுகள் நடத்தப்பட்டன. முறைப்படி அலுவலகப் பொறுப்பை ஏற்றுக் கொண்ட பசுபதிக்கு, அங்கு திரண்டிருந்த மாநில, மாவட்ட மற்றும் ஒன்றிய அதிமுக நிர்வாகிகள் பயனாடைகள் மற்றும் சால்வைகள் அணிவித்துத் தங்களது வாழ்த்துகளைத் தெரிவித்துக் கொண்டனர்.
இதனைத் தொடர்ந்து, கட்சி அலுவலக வளாகத்தில் அமைந்துள்ள அதிமுக நிறுவனத் தலைவர் எம்.ஜி.ஆரின் சிலைக்குப் பசுபதி தரப்பினர் தூய்மைப் பணிகள் மேற்கொண்டு, அதற்கு மாலை அணிவித்து மரியாதை செலுத்தினர். அலுவலகத்தைக் கைப்பற்றியதைக் கொண்டாடும் வகையில், திரண்டிருந்த தொண்டர்கள் மற்றும் நிர்வாகிகள் கட்சி அலுவலகத்தின் முன்பாகப் பட்டாசுகள் வெடித்தும், பொதுமக்களுக்கு இனிப்புகளை வழங்கியும் தங்களது மகிழ்ச்சியை வெளிப்படுத்தினர். இந்த நிகழ்வுகளுக்குப் பின்னர், புதிய மாவட்டச் செயலாளர் பசுபதி அங்கிருந்த முக்கிய நிர்வாகிகளுடன் அமர்ந்து, மாவட்டத்தில் அடுத்தகட்டமாகக் கட்சிப் பணிகளை எவ்வாறு முன்னெடுத்துச் செல்வது என்பது குறித்து ஆலோசனைக் கூட்டம் நடத்தித் தனது பணிகளைத் தொடங்கினார். இந்தச் சம்பவத்தால் விழுப்புரம் மாவட்ட அதிமுக அரசியலில் நிலவி வந்த சாவி சர்ச்சை தற்காலிகமாக முடிவுக்கு வந்துள்ளது.
