Chennai , June 15 : தொலைக்காட்சி நகைச்சுவை நடிகர் நாஞ்சில் விஜயன் தமக்குத் தர வேண்டிய பணத்தைத் தராமல் ஏமாற்றி வருவதுடன் ,ரகசிய வீடியோவை வைத்து தம்மைக் கடத்தி மிரட்டுவதாகக் கூறி ,பாதிக்கப்பட்ட பெண் ஒருவர் சென்னை மாநகரக் காவல் ஆணையரகத்தில் புகார் அளித்துள்ளார். திருச்சியைச் சேர்ந்த சூர்யா என்ற அந்தப் பெண் ,காவல் ஆணையர் அலுவலகத்தில் நேரில் ஆஜராகி அளித்த இந்தப் புகார் ,ஊடகத் துறையினர் மற்றும் சின்னத்திரை வட்டாரத்தில் பெரும் பரபரப்பை ஏற்படுத்தியுள்ளது.
காவல் ஆணையரகத்தில் புகார் அளித்த பின் செய்தியாளர்களைச் சந்தித்த சூர்யா ,தமக்கும் நாஞ்சில் விஜயனுக்கும் இடையே உள்ள கடந்த காலப் பழக்கம் மற்றும் தற்போதைய மோதல்கள் குறித்த விவரங்களை விரிவாகப் பகிர்ந்துகொண்டார். கடந்த 2019ஆம் ஆண்டு நாஞ்சில் விஜயனின் தங்கை திருமணத்திற்காகத் தாம் இரண்டு லட்சம் ரூபாய் கடனாகக் கொடுத்ததாக சூர்யா தெரிவித்தார். உதவி செய்ய வேண்டும் என்ற நல்லெண்ணத்தில் ,வளசரவாக்கத்தில் உள்ள அவரது இல்லத்தில் வைத்து அந்தப் பணத்தை நேரடியாக வழங்கியதாகவும் ,ஆனால் அதற்கான முறையான ஆவண ஆதாரங்கள் எதுவும் தன்னிடம் இல்லை என்றும் அவர் குறிப்பிட்டுள்ளார்.
மூன்று ஆண்டுகளுக்கு முன்பு நாஞ்சில் விஜயன் மீது பல்வேறு புகார்கள் மற்றும் சர்ச்சைகள் எழுந்தபோது ,இந்த விவகாரத்தைக் கிளப்பினால் யாரும் நம்ப மாட்டார்கள் என்பதால் தாம் அப்போது அமைதி காத்ததாக சூர்யா கூறினார். ஆனால் ,தற்போது தமக்குக் கடுமையான பண நெருக்கடி ஏற்பட்டுள்ள சூழலில் ,கடந்த ஆறு மாதங்களாக நாஞ்சில் விஜயனைத் தொடர்பு கொண்டு தமக்கு வரவேண்டிய தொகையைக் கேட்டுள்ளார். கடந்த ஆண்டு ஜூன் ,ஜூலை மாதங்களில் இருந்தே பணத்தைத் திருப்பித் தருவதாகக் கூறி நாஞ்சில் விஜயன் காலம் கடத்தி வந்ததாகவும் ,சென்னையில் அவரது தற்போதைய முகவரி தெரியாததால் தம்மால் நேரில் சென்று கேட்க முடியவில்லை என்றும் சூர்யா வேதனை தெரிவித்தார்.
இதற்கிடையில் ,வைஷு என்ற பெண்ணுடனான விவகாரத்தில் நாஞ்சில் விஜயன் சிக்கியபோது ,சூர்யாவைத் தொடர்பு கொண்டு அந்தப் பெண்ணை யாரைக் கொண்டாவது கட்டுப்படுத்த முடியுமா என்று உதவி கேட்டுள்ளார். அப்போது ,”உங்களுடைய தனிப்பட்டப் பிரச்சனைகளில் என்னைக் கூட்டுச் சேர்க்காதீர்கள்” என்று சூர்யா மறுத்துள்ளார். நாஞ்சில் விஜயன் தொலைபேசி அழைப்புகளைத் தவிர்த்து ,முற்றிலும் வாட்ஸ்அப் கால்கள் மற்றும் வாட்ஸ்அப் குறுஞ்செய்திகள் மூலமாக மட்டுமே பேசி வந்துள்ளார். சாதாரண அலைபேசி அழைப்பில் பேசினால் உரையாடல்கள் பதிவு செய்யப்படலாம் என்பதால் ,திட்டமிட்டே அவர் கிரிமினல் தனத்துடன் வாட்ஸ்அப் தளத்தைப் பயன்படுத்தியதாக சூர்யா குற்றம் சாட்டினார். அதற்கான சான்றுகளாக ,வாட்ஸ்அப் அரட்டையின் அனைத்து நகல்களையும் தாம் ஆதாரமாகச் சேகரித்து வைத்துள்ளதாக அவர் குறிப்பிட்டார்.
சமீபத்தில் மதுரையில் நடைபெற்ற ஒரு கண்காட்சியில் (Expo) நாஞ்சில் விஜயனைச் சந்திக்கச் சென்றபோது இந்த மோதல் உச்சக்கட்டத்தை எட்டியுள்ளது. அங்கு சூர்யா துணிகளைத் தேர்வு செய்துவிட்டு அதற்கான பணத்தைக் கொடுக்க முற்பட்டபோது ,நாஞ்சில் விஜயன் அதை வாங்க மறுத்து ,”நீ பணத்தைத் தர வேண்டாம் சூர்யா ,நான்தான் உனக்குத் தர வேண்டும்” என்று கூறி துணிகளை எடுத்துச் செல்லுமாறு வற்புறுத்தியுள்ளார். ஆனால் ,சூர்யா அந்த இடத்தை விட்டு நகர்ந்து வெளியே வந்தவுடன் ,நாஞ்சில் விஜயன் மூன்று நபர்களுடன் காரில் வந்து சூர்யாவின் வாகனத்தை வழிமறித்துள்ளார். “பணம் கொடுக்காமல் துணிகளை எடுத்துச் செல்கிறாயா?” என்று சத்தம் போட்டு ,சூர்யாவுக்கு எதிராகப் போலிப் புகாரை உருவாக்குவதற்காக அதனை வீடியோவாகப் பதிவு செய்துள்ளனர்.
அந்த வீடியோவைக் காண்பித்து ,தமக்கு எதிராகப் பேசினால் சமூக வலைத்தளங்களில் வெளியிட்டு அசிங்கப்படுத்திவிடுவேன் என்று நாஞ்சில் விஜயன் தம்மைக் கடுமையாக மிரட்டுவதாகச் சூர்யா குற்றம் சாட்டினார். மேலும் ,அந்தப் பொருட்காட்சி நடைபெறும் பகுதிக்கு மீண்டும் வந்தால் ,அங்குள்ள பெண் வியாபாரிகளைக் கொண்டு பொய்ப் புகார் அளித்து சிறையில் அடைத்துவிடுவேன் என்றும் ஆட்களை வைத்து மிரட்டல் விடுத்துள்ளார்.
தமக்குக் குழந்தைகளும் குடும்பமும் இருப்பதால் ,சட்டம் ஒழுங்குப் பிரச்சினைகளில் ஈடுபடாமல் அமைதியான முறையில் பணத்தைப் பெறவே தாம் விரும்பியதாகக் குறிப்பிட்ட சூர்யா ,மிரட்டல்கள் எல்லை மீறியதால் வேறு வழியின்றி சட்டப்படி நடவடிக்கை எடுக்கத் துணிந்ததாகத் தெரிவித்தார். இது தொடர்பாக ஏற்கனவே திருச்சியில் உள்ள மாவட்டக் காவல் கண்காணிப்பாளர் அலுவலகத்தில் புகார் அளிக்கப்பட்ட நிலையில் ,தற்போது உரிய விசாரணைக்காகச் சென்னை மாநகரக் காவல் ஆணையரகத்திற்குத் தாம் வந்துள்ளதாகக் கூறினார். சூர்யா அளித்த புகாரைப் பெற்றுக் கொண்ட சென்னை காவல்துறை அதிகாரிகள் ,இந்த விவகாரம் குறித்து முழுமையாக விசாரணை நடத்தி அடுத்தகட்ட நடவடிக்கை எடுப்பதாக உறுதி அளித்துள்ளனர்.
