சாத்தான்குளம் கொலை: 9 போலீசாரின் தூக்கு தண்டனைக்கு இடைக்கால அவகாசம் – சென்னை உயர் நீதிமன்ற மதுரை கிளை
மதுரை , ஏப்ரல் 24 : தமிழ்நாட்டையே உலுக்கிய சாத்தான்குளம் தந்தை மற்றும் மகன் காவல் மரண வழக்கில் விசாரணை நீதிமன்றம் விதித்த மரண தண்டனையை எதிர்த்து மேல்முறையீடு செய்ய சம்மந்தப்பட்ட ஒன்பது காவலர்களுக்கும் சென்னை உயர் நீதிமன்ற மதுரை கிளை கால அவகாசம் வழங்கி உத்தரவிட்டுள்ளது.
தூத்துக்குடி மாவட்டம் சாத்தான்குளத்தைச் சேர்ந்த வணிகர் ஜெயராஜ் மற்றும் அவரது மகன் பெனிக்ஸ் ஆகியோர் கடந்த 2020ஆம் ஆண்டு ஜூன் மாதம் ஊரடங்கு விதிகளை மீறி கடை திறந்ததாகக் கூறி காவல் துறையினரால் விசாரணைக்கு அழைத்துச் செல்லப்பட்டனர். அன்று இரவு முழுவதும் காவல் நிலையத்தில் வைத்து அவர்கள் மிகக் கொடூரமாகத் தாக்கப்பட்டதில் இருவரும் அடுத்தடுத்து உயிரிழந்தனர். நாடு முழுவதும் மனித உரிமை ஆர்வலர்கள் மற்றும் பொதுமக்களிடையே பெரும் கொந்தளிப்பை ஏற்படுத்திய இந்த வழக்கை சென்னை உயர் நீதிமன்றத்தின் உத்தரவின் பேரில் மத்திய புலனாய்வு அமைப்பு (சிபிஐ) கையில் எடுத்தது. தீவிர விசாரணைக்குப் பிறகு வழக்கில் தொடர்புடைய ஒன்பது காவலர்களும் கைது செய்யப்பட்டு சிறையில் அடைக்கப்பட்டனர்.
மதுரை மாவட்ட நீதிமன்றத்தில் நடைபெற்று வந்த இந்த வழக்கின் இறுதி விசாரணையில் ஒன்பது காவலர்களுக்கும் நீதிமன்றம் அண்மையில் தூக்கு தண்டனை விதித்து தீர்ப்பளித்தது. சட்ட நடைமுறைகளின்படி விசாரணை நீதிமன்றம் வழங்கும் மரண தண்டனையை உயர் நீதிமன்றம் உறுதி செய்ய வேண்டும் என்பதால் தமிழக அரசு மற்றும் சிபிஐ தரப்பில் சென்னை உயர் நீதிமன்ற மதுரை கிளையில் இதற்கான மனுக்கள் தாக்கல் செய்யப்பட்டன.
இந்த மனுக்கள் சென்னை உயர் நீதிமன்ற மதுரை கிளையின் நீதிபதிகள் ஆனந்த் வெங்கடேஷ் மற்றும் ராமகிருஷ்ணன் ஆகியோர் அடங்கிய அமர்வு முன்பாக விசாரணைக்கு வந்தன. அப்போது சிறையில் அடைக்கப்பட்டுள்ள ஒன்பது முன்னாள் காவலர்களும் காணொளி வாயிலாக நீதிமன்றத்தில் ஆஜர்படுத்தப்பட்டனர். அப்போது நீதிபதிகள் அவர்களுக்கு விதிக்கப்பட்ட மரண தண்டனையை உறுதி செய்ய சிபிஐ மனு தாக்கல் செய்துள்ளதைச் சுட்டிக்காட்டி இதற்கு எதிராக மேல்முறையீடு செய்ய விரும்புகிறீர்களா என்று நேரடியாகக் கேள்வி எழுப்பினர்.
அதற்கு ஒன்பது காவலர்களும் தாங்கள் விசாரணை நீதிமன்றத் தீர்ப்பை எதிர்த்து மேல்முறையீடு செய்ய விரும்புவதாகத் தெரிவித்தனர். இதனைப் பதிவு செய்து கொண்ட நீதிபதிகள் காவலர்கள் தரப்பில் தங்களது மேல்முறையீட்டு மனுக்களைத் தாக்கல் செய்ய வரும் 30ஆம் தேதி வரை அவகாசம் வழங்கி உத்தரவிட்டனர். மேலும் இந்த வழக்கின் அடுத்தகட்ட விசாரணையை அடுத்த வாரத்திற்கு ஒத்திவைத்தனர்.
