சென்னை , ஏப்ரல் 3 : தமிழகத்தில் 2026 சட்டமன்றத் தேர்தல் களம் சூடுபிடித்துள்ள நிலையில்,வாக்காளர்களை,குறிப்பாக இளம் தலைமுறையினரை வாக்குச்சாவடிக்கு வரவைப்பதற்காகப் பல்வேறு புதிய உத்திகள் கையாளப்பட்டு வருகின்றன. இதன் ஒரு பகுதியாக,மருத்துவர்கள் குழு ஒன்று இணைந்து உருவாக்கியுள்ள ‘வா வோட்டு போடு’ (VAA VOTE PODU) என்ற ராப் இசைப் பாடல் தற்போது சமூக ஊடகங்களில் வெளியாகி,இளைஞர்கள் மத்தியில் பெரும் வரவேற்பைப் பெற்று வருகிறது.
Also : மதுரை பிரச்சாரத்தில் கனிமொழி கடும் தாக்கு – “NDAக்கு வாக்களிக்க மக்கள் தயாரில்லை”
பொதுவாகத் தேர்தல் ஆணையமும்,சமூக அமைப்புகளும் துண்டுப் பிரசுரங்கள்,சுவரொட்டிகள் மற்றும் பாரம்பரிய விளம்பரங்கள் மூலமே வாக்காளர் விழிப்புணர்வை ஏற்படுத்துவது வழக்கம். ஆனால்,இந்த முறை தற்போதைய இளம் தலைமுறையினரைக் கவரும் நோக்கில்,அவர்களுக்குப் பிடித்தமான ‘ராப்’ (Rap) இசை வடிவத்தை மருத்துவர்கள் கையில் எடுத்துள்ளனர். “வாக்களிப்பது என்பது வெறும் கடமை மட்டுமல்ல,அது நம் ஒவ்வொருவரின் உரிமை” என்ற வலுவான கருத்தை மையமாகக் கொண்டு இந்தத் தேர்தல் விழிப்புணர்வுப் பாடல் உருவாக்கப்பட்டுள்ளது. தேர்தல் நாளன்று வாக்குச்சாவடிக்குச் சென்று வாக்களிக்க வேண்டியதன் அவசியத்தை எளிய வரிகளில்,அதே சமயம் துள்ளலான இசையோடு இப்பாடல் எடுத்துரைக்கிறது.
தமிழ்நாட்டில் தற்போது சுமார் 5.67 கோடிப் பதிவுசெய்யப்பட்ட வாக்காளர்கள் உள்ள நிலையில்,இவர்களில் கணிசமான எண்ணிக்கையில் இருப்பவர்கள் இளம் வாக்காளர்கள் ஆவர். இவர்களின் வாக்குகள் தேர்தல் முடிவுகளைத் தீர்மானிப்பதில் முக்கியப் பங்கு வகிக்கும் என்பதால்,இவர்களைச் சென்றடைவதே இப்பாடலின் முதன்மை நோக்கமாக உள்ளது. மருத்துவர்களின் இந்தத் துணிச்சலான மற்றும் புதுமையான முயற்சிக்குச் சமூக வலைத்தளங்களில் பாராட்டுகள் குவிந்து வருகின்றன.
