சேலம் , மே 11 : தமிழகத்தில் அதிகரித்து வரும் கஞ்சா உள்ளிட்ட போதைப்பொருள் புழக்கம் மற்றும் மது கலாசாரத்திற்கு எதிராகப் புதிய அரசு போர்க்கால அடிப்படையில் கடுமையான நடவடிக்கைகளை மேற்கொள்ள வேண்டும் என்று பாட்டாளி மக்கள் கட்சியின் தலைவர் மருத்துவர் அன்புமணி ராமதாஸ் வலியுறுத்தியுள்ளார்.
சேலம் அருகே காட்டுவளவு பகுதியில் அண்மையில் மது போதையில் ஏற்பட்ட மோதலில் கோகுல் என்ற கல்லூரி மாணவர் கத்தியால் குத்திக்கொலை செய்யப்பட்ட அதிர்ச்சியூட்டும் சம்பவத்தை சுட்டிக்காட்டி அவர் இந்த கோரிக்கையை முன்வைத்துள்ளார்.
சேலம் சம்பவத்தைப் பொறுத்தவரை, மாணவர்களுக்கு இடையே ஏற்பட்ட தகராறு கொலையில் முடிந்துள்ளது. இந்த வன்முறைச் சம்பவத்தில் இரண்டு மாணவர்கள் உட்பட மூன்று பேருக்குத் தொடர்பு இருப்பதாகக் கூறப்படும் நிலையில், கொலையைத் தொடர்ந்து அங்கிருந்த சில சிறுவர்கள் அதனைத் தங்களது மொபைல் போன்களில் காணொளியாக பதிவு செய்ததாக வெளியான தகவல் ஒட்டுமொத்த பொதுமக்களையும், சமூக ஆர்வலர்களையும் உலுக்கியுள்ளது.
ALso Read : முதல்வர் விஜய் – EX CM ஸ்டாலின் சந்திப்பு அரசியலில் புதிய அத்தியாயமா? “எதிரி போல் எண்ணக்கூடாது ” –
இந்த கொடூரச் சம்பவத்தைக் குறிப்பிட்டு அறிக்கை வெளியிட்டுள்ள அன்புமணி ராமதாஸ், தமிழகத்தில் இளைஞர்கள் மற்றும் மாணவர்கள் மத்தியில் கஞ்சா, மது உள்ளிட்ட போதைப்பொருட்களின் தாக்கம் ஆபத்தான எல்லைகளைத் தொட்டு வருவதாகத் தனது ஆழந்த கவலையை வெளிப்படுத்தியுள்ளார். குறிப்பாக, பள்ளி மற்றும் கல்லூரி மாணவர்களிடையே தற்காலத்தில் உருவாகி வரும் இத்தகைய வன்முறைப் போக்குகள், ஒட்டுமொத்த சமூகத்திற்கும் விடுக்கப்பட்டுள்ள மிகப்பெரிய எச்சரிக்கை மணி என்று அவர் எச்சரித்துள்ளார்.
தமிழகத்தில் நிலவி வரும் தற்போதைய சூழலில், மது மற்றும் இதர போதைப்பொருட்களின் விற்பனையை முற்றிலும் கட்டுப்படுத்த புதிய அரசு உடனடியாக களமிறங்க வேண்டும் எனவும், காலதாமதமின்றி போர்க்கால அடிப்படையில் இதற்கான சிறப்புத் திட்டங்களைச் செயல்படுத்த வேண்டும் எனவும் அவர் கேட்டுக்கொண்டுள்ளார். போதை பழக்கவழக்கங்கள் என்பது தனிமனிதப் பாதிப்பு மட்டுமல்லாமல், ஒட்டுமொத்த சமூக அமைப்பையே சீர்குலைப்பதுடன், நாட்டின் தூண்களாக விளங்க வேண்டிய இளைஞர்களின் எதிர்காலத்தை முற்றிலும் இருளடையச் செய்து வருவதாக அவர் தனது அறிக்கையில் விவரித்துள்ளார்.
தற்போது சேலத்தில் நடந்துள்ள இந்த மாணவர் கொலைச் சம்பவம், தமிழகம் முழுவதும் சட்டம்-ஒழுங்கு மற்றும் சமூகப் பாதுகாப்பு குறித்த விவாதங்களை மீண்டும் தீவிரப்படுத்தியுள்ளது. மாணவர்களுக்குள் ஏற்பட்ட சாதாரணப் பூசல் கொலையில் முடிந்தது ஒருபுறமிருக்க, அந்த வன்முறையைச் சற்றும் பதற்றமின்றி சிறுவர்கள் வீடியோ எடுத்ததாகக் கூறப்படும் அம்சம், இளந்தலைமுறையினரின் மனநிலை எந்தப் பாதையை நோக்கிச் சென்று கொண்டிருக்கிறது என்ற அச்சத்தை எற்படுத்தியிருப்பதாக சமூகவியலாளர்கள் கவலை தெரிவிக்கின்றனர்.
தமிழகத்தைப் பொறுத்தவரை கஞ்சா உள்ளிட்ட சட்டவிரோத போதைப்பொருட்களின் நடமாட்டம், பள்ளி, கல்லூரிப் பகுதிகளுக்கு அருகில் அவற்றின் ரகசிய விற்பனை மற்றும் டாஸ்மாக் மதுபானக் கலாசாரம் ஆகியவை நீண்டகாலமாகவே முதன்மையான அரசியல் மற்றும் சமூக விவாதங்களாக இருந்து வருகின்றன. குறிப்பாக, இளைஞர்கள் மற்றும் சிறுவர்கள் சம்பந்தப்படும் குற்றச்சம்பவங்கள் மாநிலத்தில் அதிகரிக்கும் போதெல்லாம், போதைப்பொருள் கட்டுப்பாட்டு வாரியத்தின் செயல்பாடுகள் குறித்தும், காவல் துறையின் தடுப்பு நடவடிக்கைகள் குறித்தும் எதிர்க்கட்சிகளும் சமூக நல அமைப்புகளும் தொடர்ந்து கேள்விகளை எழுப்பி வருகின்றன.
இந்தச் சூழலில், பாமக தலைவர் அன்புமணி ராமதாஸ் எழுப்பியுள்ள இந்தக் கருத்துக்கள், மாநிலத்தில் சட்டம்-ஒழுங்கைப் பராமரிப்பதிலும், போதைப்பொருள் ஒழிப்பிலும் புதிய அரசு இனிவரும் நாட்களில் எத்தகையக் கடுமையான அணுகுமுறையைக் கையாளப் போகிறது என்ற எதிர்பார்ப்பையும், விவாதத்தையும் அரசியல் வட்டாரத்தில் ஏற்படுத்தியுள்ளது.
