Chennai , May 11 : தமிழக அரசியல் களத்தில் பல தசாப்தங்களாக வேரூன்றியிருந்த ‘பகைமை அரசியல்’ பண்பாட்டை மாற்றி, புதியதொரு ஜனநாயக நாகரிகத்திற்கு வழிவகுக்கும் சாத்தியக்கூறுகள் தற்போது தென்படத் தொடங்கியுள்ளன. தமிழகத்தின் புதிய முதலமைச்சராகப் பொறுப்பேற்றுள்ள விஜய், விரைவில் முன்னாள் முதலமைச்சரும் எதிர்க்கட்சித் தலைவருமான மு.க.ஸ்டாலினை நேரில் சந்திக்கத் திட்டமிட்டுள்ளதாக வெளியாகியுள்ள தகவல்கள், கோட்டை வட்டாரங்கள் மட்டுமன்றி ஒட்டுமொத்த அரசியல் தளத்திலும் புதிய விவாதங்களை கிளப்பியுள்ளன.
இதேபோல், மதிமுக பொதுச்செயலாளர் வைகோ உள்ளிட்ட பிற மூத்த தலைவர்களையும் அவர் சந்திக்கக்கூடும் எனத் தெரிகிறது. கொள்கை ரீதியாகவும் தேர்தல் களத்திலும் கடுமையான முரண்பாடுகளைக் கொண்டிருந்தாலும், ஆட்சிப் பொறுப்புக்கு வந்த பிறகு மாற்றுத் தரப்புத் தலைவர்களை நேரில் சந்தித்து வாழ்த்துப் பெறுவதும், மாநில நலன் சார்ந்து உரையாடுவதும் ஆரோக்கியமான அரசியல் பண்பாடாகவே பார்க்கப்படுகிறது. பிற மாநிலங்களில் ஆளுங்கட்சி மற்றும் எதிர்க்கட்சித் தலைவர்கள் பரஸ்பரம் அரசு விழாக்களிலும், கொள்கை சார்ந்த ஆலோசனைகளிலும் முதிர்ச்சியோடு பங்கேற்கும் சூழல் இயல்பான ஒன்றாகவே இருந்து வருகிறது. ஆனால், தமிழக அரசியல் வரலாற்றில் கடந்த சில தசாப்தங்களாக இத்தகைய மரபு முற்றிலுமாக அற்றுப்போயிருந்தது என்றே கூற வேண்டும். தலைமை மட்டத்தில் நிலவிய ஈகோவும் கசப்புணர்வும், அடிமட்டத் தொண்டர்கள் வரை பாய்ந்து ஒருவரையொருவர் நிரந்தர எதிரிகளாகப் பார்க்கும் ஒரு தேக்கநிலையை உருவாக்கியிருந்தது.
இந்தச் சூழலில், புதிய முதலமைச்சர் விஜயின் இந்த அணுகுமுறை உடனடியாக ஒட்டுமொத்தப் பண்பாட்டையும் மாற்றிவிடாது என்றாலும், தேங்கிப்போன அரசியலில் ஒரு புதிய காற்றை சுவாசிக்கச் செய்யும் தொடக்கமாக நிச்சயம் அமையும். ஜனநாயக அமைப்பில் மாற்றுத் திறனாய்வு கொண்டவர்களை எதிரிகளாக அல்லாமல், வெறும் அரசியல் களப் போட்டியாளர்களாக மட்டுமே அணுக வேண்டிய முதிர்ச்சி இரு தரப்பிற்கும் தேவைப்படுகிறது. முந்தைய காலங்களில் நிலவிய தொடர் அரசியல் குற்றச்சாட்டுகளும், தனிநபர் விமர்சனங்களும் பல நேரங்களில் மாநிலத்தின் முக்கியக் கட்டமைப்புத் திட்டங்களையும், மத்திய அரசிடமிருந்து பெற வேண்டிய மாநில உரிமைகளுக்கான கூட்டுப் போராட்டங்களையும் நீர்த்துப்போகச் செய்துள்ளன என்பதை மறுப்பதற்கில்லை.
இத்தகைய புதிய தொடக்கத்திற்கான எதிர்பார்ப்புகள் ஒருபுறமிருக்க, நேற்று நடைபெற்ற புதிய முதலமைச்சரின் பதவியேற்பு விழாவில் பிரதான எதிர்க்கட்சிகளான திமுக மற்றும் அதிமுக ஆகியவற்றின் பிரதிநிதிகள் பெருமளவில் பங்கேற்காதது அரசியல் பார்வையாளர்கள் மத்தியில் சில கேள்விகளை எழுப்பியுள்ளது. நீண்டகாலமாகத் தொடரும் அரசியல் மனக்கசப்புகளும், முந்தைய கசப்பான அனுபவங்களுமே இந்தத் தவிர்ப்புக்குக் காரணமாக இருக்கலாம் என விவாதிக்கப்பட்டாலும், தமிழகத்தில் நாகரிக அரசியல் மீண்டும் துளிர்விட வேண்டுமானால், இத்தகைய வரலாற்றுச் சிறப்புமிக்க நிகழ்வுகளில் எதிர்க்கட்சிகள் தங்களின் பங்களிப்பை உறுதி செய்திருக்க வேண்டும் என்பதே நடுநிலையான பார்வையாக இருக்கிறது.
தமிழக வரலாற்றைத் திரும்பிப் பார்க்கும்போது, கருத்தியல் ரீதியாகத் தீயும் நீருமாக முரண்பட்டுக் கொண்ட தலைவர்கள்கூட தனிப்பட்ட முறையில் உயர்ந்த மரியாதையைப் பேணியதை நினைவுகூர முடியும். மறைந்த முதலமைச்சர்கள் எம்.ஜி.ஆரும் கருணாநிதியும் சட்டமன்றத்திலும் தேர்தல் மேடைகளிலும் கடுமையாக மோதிக்கொண்டவர்கள். ஆனால், எம்.ஜி.ஆர் எப்போதும் கருணாநிதியை அவரது பெயரால் அழைத்ததில்லை, ‘கலைஞர்’ என்றே மரியாதையுடன் விளித்தார். அதேபோல் காமராஜர், ராஜாஜி, அண்ணா போன்ற தலைவர்கள் கொள்கைப் பிடிப்போடு சமரசம் இன்றிப் போராடியபோதும், மாநில நிர்வாகம் மற்றும் மக்கள் நலன் சார்ந்த கோப்புகளில் ஒருவரையொருவர் ஆலோசித்துச் செயல்படத் தயங்கியதில்லை. எனினும், ஜெயலலிதா காலகட்டத்திற்குப் பிந்தைய அரசியல் சூழலில் இந்த இணக்கமான சூழல் முற்றிலுமாக சிதைந்து, அரசியல் மேடைகள் வெறும் தனிநபர் துவேஷங்களை உமிழும் தளங்களாக மாறின.
புதிதாகத் தேர்ந்தெடுக்கப்பட்டுள்ள இந்தச் சட்டமன்றத்தில் எதிர்க்கட்சியினரின் பலம் குறிப்பிடத்தக்க அளவில் வலுவாக இருப்பதால், வரும் நாள்களில் அவை விவாதக் களமாக மாறப் போவது உறுதி. அதே நேரத்தில், புதிய அரசு பொறுப்பேற்ற உடனேயே முந்தைய ஆட்சியைக் குறிவைத்து ‘கஜானா காலி’ என்பது போன்ற மேடைப் பேச்சுகளைத் தவிர்ப்பது நலம் பயக்கும். ஒரு மாநிலத்தின் உண்மையான நிதிநிலையை மக்கள் முன் வைக்க வேண்டுமானால், அதற்கான அதிகாரப்பூர்வ வெள்ளை அறிக்கையை வெளியிடுவதுதான் முறையான நிர்வாக வழிமுறை. வெறும் அரசியல் குற்றச்சாட்டுகளைத் தாண்டி, சவாலான நிதி நெருக்கடியை எவ்வாறு கையாளப் போகிறோம் என்ற நிர்வாகச் செயல்திறனில்தான் புதிய அரசின் வெற்றி அடங்கியிருக்கிறது.
தற்போது தமிழகத்தில் மக்கள் நலத்திட்டங்களுக்கான நிதி ஒதுக்கீடு, அரசு ஊழியர்களின் ஊதியக் கட்டமைப்பு, உள்கட்டமைப்பு மேம்பாடு போன்ற அத்தியாவசியச் செலவினங்கள் தொடர்ந்து அதிகரித்து வருகின்றன. இந்தச் சூழலில், டாஸ்மாக் மூலம் கிடைக்கும் மதுபான வருவாயை மட்டுமே முதன்மை ஆதாரமாக நம்பியிருப்பது ஒரு மாநிலத்தின் நீண்டகாலப் பொருளாதார வளர்ச்சிக்கு ஆரோக்கியமானதாக இருக்காது. வணிக வரிகள், கனிம வளம் மற்றும் குவாரித் துறைகளில் நிலவும் வருவாய்க் கசிவுகளைத் துல்லியமாகக் கண்டறிந்து தடுத்தாலே, மாநிலத்தின் நிதிநிலையைச் சீரமைக்க முடியும். அதற்கான மாற்று வருவாய் வழிகளை உருவாக்குவதில் புதிய அரசு கவனம் செலுத்த வேண்டும்.
தற்போது எழுந்துள்ள இந்தச் சந்திப்பு குறித்த செய்திகள் வெறும் நெறிமுறை சார்ந்த மரியாதை நிமித்தமான சந்திப்பாக மட்டுமே கடந்து போகக்கூடியவை அல்ல. தமிழக அரசியலில் பல ஆண்டுகளாகப் புரையோடிப் போயிருக்கும் ‘நிரந்தரப் பகைமை’ என்னும் பிம்பத்தை உடைப்பதற்கான ஒரு மெல்லிய முயற்சியாகவே இது பார்க்கப்படுகிறது. அரசியல் போட்டி என்பது ஜனநாயகத்தின் தவிர்க்க முடியாத சக்கரம் என்றாலும், மாநிலத்தின் ஒட்டுமொத்த வளர்ச்சிக்கு அனைத்துத் தரப்பினரின் ஒருங்கிணைந்த கூட்டுப் பங்களிப்பு இன்றியமையாதது. குறிப்பாக, வெறும் உணர்ச்சிவசப்படும் அரசியல் மோதல்களைத் தாண்டி, நிர்வாகச் செயல்திறன் மற்றும் வெளிப்படைத்தன்மையையே பிரதானமாக எதிர்பார்க்கும் புதிய தலைமுறை வாக்காளர்கள் பெருகிவரும் இந்தச் சூழலில், புதிய முதலமைச்சரின் இந்த நகர்வு தமிழக அரசியலின் நீண்டகாலப் போக்கை மாற்றியமைக்குமா என்பதைப் பொறுத்திருந்துதான் பார்க்க வேண்டும்.
சூப்பர்