சென்னை , ஏப்ரல் 23 : தமிழ்நாடு சட்டமன்றத் தேர்தல் களம் நாளுக்கு நாள் விறுவிறுப்படைந்து வரும் சூழலில், தமிழக வெற்றிக் கழகத்தின் தலைவர் விஜய் தேர்தல் ஆணையத்திற்கு அனுப்பியுள்ள திடீர் கடிதம் அரசியல் வட்டாரத்தில் பெரும் விவாதத்தைக் கிளப்பியுள்ளது. வாக்குப்பதிவு நாளில் வாக்குச்சாவடிகளின் ஒட்டுமொத்தப் பாதுகாப்பு மற்றும் வாக்காளர்களுக்கான அடிப்படை வசதிகளை முற்றிலும் மறுசீரமைப்பு செய்ய வேண்டும் என்பதே அவரது இந்தக் கடிதத்தின் முக்கிய சாரமாக அமைந்துள்ளது. குறிப்பாகப் பெண்கள், முதியவர்கள் மற்றும் மாற்றுத்திறனாளிகளின் பாதுகாப்பான வாக்குப்பதிவை உறுதி செய்ய வேண்டியதன் அவசியத்தை அவர் இதில் விரிவாக முன்வைத்துள்ளார்.
விஜய் தனது கடிதத்தில் வாக்குச்சாவடிகளின் பாதுகாப்பு அம்சங்கள் குறித்துப் பேசும்போது, ஒவ்வொரு வாக்குச்சாவடி மையத்திலும் குறைந்தபட்சம் ஒரு பெண் காவலராவது கட்டாயமாகப் பணியமர்த்தப்பட வேண்டும் என்று குறிப்பிட்டுள்ளார். தமிழகத்தில் ஆண் வாக்காளர்களுக்கு இணையாகவும், பல தொகுதிகளில் ஆண்களை விட அதிகமாகவும் பெண்கள் வாக்குப்பதிவில் பங்கேற்கும் சூழல் நிலவுகிறது. எனவே, அவர்கள் எவ்வித அச்சமும் இன்றி, சுதந்திரமாகத் தங்களின் ஜனநாயகக் கடமையை ஆற்ற இத்தகைய பாதுகாப்பு ஏற்பாடு மிக முக்கியம் என்று அவர் சுட்டிக்காட்டியுள்ளார். இதனுடன் தேர்தல் நடைபெறும் நாளில் தொகுதிக்குட்பட்ட பிரதான சாலைகளில் காவல்துறையின் ரோந்துப் பணிகளைப் பலமடங்கு அதிகரிக்க வேண்டும் என்றும், இது வாக்குப்பதிவு நாளில் ஆங்காங்கே ஏற்படக்கூடிய சட்டம் ஒழுங்குச் சிக்கல்களை ஆரம்பத்திலேயே தடுக்க உதவும் என்றும் அவர் தெரிவித்துள்ளார்.
Also : வாக்குப்பதிவு எந்திரங்களை சுமந்து சென்ற குதிரைகள்: மலைக்கிராமத்தில் தேர்தல் அதிசயம்!
பாதுகாப்புப் பணிகளில் நவீனத் தொழில்நுட்பங்களைப் புகுத்த வேண்டியதன் அவசியத்தையும் தவெக தலைவர் தனது கடிதத்தில் வலியுறுத்தியுள்ளார். தேர்தல் செயல்முறையின் வெளிப்படைத்தன்மையை முழுமையாக நிலைநாட்ட, அனைத்து வாக்குச்சாவடிகளிலும் சிசிடிவி கேமரா கண்காணிப்பு வளையத்தைக் கொண்டு வர வேண்டும் என்று கோரியுள்ளார். மேலும், பதற்றமான பகுதிகள் மற்றும் முக்கிய இடங்களில் ட்ரோன் கேமராக்கள் மூலம் வான்வழிப் பாதுகாப்புக் கண்காணிப்பை மேற்கொள்ள வேண்டும் எனவும், ஒட்டுமொத்தத் தேர்தல் நடவடிவக்கைகளையும் பதிவு செய்யத் தனி வீடியோ ஆவணப் பணிக் குழுக்களை அமைக்க வேண்டும் எனவும் அவர் பரிந்துரைத்துள்ளார். வாக்குச்சாவடிகளில் முறைகேடுகள் நடப்பதாகப் பல்வேறு அரசியல் கட்சிகள் தொடர்ந்து கவலை தெரிவித்து வரும் நிலையில், விஜயின் இந்தத் தொழில்நுட்பக் கண்காணிப்புப் பரிந்துரைகள் தேர்தல் முறைகேடுகளை முற்றுப்புள்ளியாகக் குறைக்கும் என்று அரசியல் நோக்கர்கள் கருதுகின்றனர்.
வெறும் பாதுகாப்புத் தளத்தை மட்டும் பேசாமல், வாக்குச்சாவடிக்கு வரும் சாமானிய வாக்காளர்களின் மனிதநேய அடிப்படையிலான வசதிகள் குறித்தும் இக்கடிதத்தில் அழுத்தமாகப் பேசப்பட்டுள்ளது. மாற்றுத்திறனாளிகள் எவ்வித சிரமமும் இன்றி வாக்குச்சாவடிக்குள் சென்று வர ஏதுவான சாய்வுதளப் பாதைகள் மற்றும் எளிதான அணுகல் முறைகள் உருவாக்கப்பட வேண்டும் என விஜய் கேட்டுக்கொண்டுள்ளார். அதேபோல், நீண்ட வரிசையில் நின்று வாக்களிக்கத் திணறும் முதியவர்களுக்குத் தனி வழித்தடங்கள் மற்றும் சிறப்பு அமரும் வசதிகளையும், பெண் வாக்காளர்களுக்குப் பாதுகாப்பான தனித்துவமான சூழலையும் தேர்தல் ஆணையம் ஏற்படுத்தித் தர வேண்டும் என்று குறிப்பிட்டுள்ளார். இந்த எளிய நடைமுறை மாற்றங்கள் வாக்குச்சாவடிகளுக்கு வரும் பொதுமக்களின் எண்ணிக்கையை கணிசமாக உயர்த்தும் என்றும் அவர் நம்பிக்கை வெளியிட்டுள்ளார்.
