சிறப்பு பக்தி தொகுப்பு : சமகாலச் சமூகத்தில் ,உலக நாடுகள் முழுவதிலும் விவாகரத்துகளும் ,கணவன்-மனைவிக்கு இடையேயான கருத்து வேறுபாடுகளும் ,பிரிவுகளும் மிக அதிவேகமாக அதிகரித்து வருகின்றன. மிகச் சிறிய மற்றும் அற்பமான காரணங்களுக்காகத் தம்பதியினர் தங்களுக்குள் இருக்கும் உறவை முறித்துக் கொண்டு ,நீதிமன்றப் படிகளில் ஏறும் சூழல் அண்மைக் காலமாகச் சமூகத்தில் பெரும் கவலையை ஏற்படுத்தியுள்ளது.
இத்தகையச் சூழலில் ,இல்லறத் தம்பதியரிடையே அன்யோன்யத்தையும் ,மனமகிழ்ச்சியையும் வளர்த்து ,பிரிந்தவர்களை மீண்டும் ஒன்று சேர்க்கும் ஆன்மீக வழிமுறைகள் மற்றும் பதிகங்கள் குறித்து திருமுருக வள்ளல் வாரியார் சுவாமிகளின் மாணவியான சொற்பொழிவாளர் தேசமங்கையற்கரசி விளக்கியுள்ளார்.
இல்லறத்தின் உயர்வு
மனித வாழ்க்கையில் இல்லற வாழ்க்கை ,துறவற வாழ்க்கை என இரண்டு பிரிவுகள் உள்ளதாகக் குறிப்பிட்ட அவர் ,இதில் இல்லறத்தோடு கூடிய துறவறமே மிக உயர்ந்தது என்று முன்னோர்கள் வலியுறுத்தியுள்ளதாகத் தெரிவித்தார். இல்லற வாழ்க்கை சிறப்பாக அமைய வேண்டுமானால் கணவனும் மனைவியும் மனமகிழ்ச்சியுடனும் ,ஒருமித்த கருத்தோடும் வாழ வேண்டும் என்பதே நிதர்சனமான உண்மை.
கணவன்-மனைவி ஒற்றுமைக்கு இலக்கணமாக அவ்வையார் அருளிய ,“ஒன்றாக காண்பதுவே காட்சி” என்ற வரிகளை அவர் சுட்டிக்காட்டினார். மனித உடலில் உள்ள இரு கண்கள் எவ்வாறு வெவ்வேறு திசைகளில் பார்க்காமல் ,ஒரு பொருளை நோக்கியே ஒன்றாகப் பார்க்கின்றனவோ ,அதேபோல கணவனும் மனைவியும் ஒரே சிந்தனையுடனும் ,குறிக்கோளுடனும் செயல்படுவதே உண்மையான இல்லற தர்மம் ஆகும்.
அன்பின் விலங்கு
இன்றைய தம்பதியரிடையே பரஸ்பரம் ஒருவரை ஒருவர் அடக்கி ஆள வேண்டும் என்ற எண்ணமே மேலோங்கியுள்ளது. ஆனால் ,இல்லறம் என்பது ஒருவரை ஒருவர் அடக்குவது அல்ல; அன்பினால் அடங்கி இருப்பது மட்டுமே வாழ்க்கையை முழுமையாக்கும்.
உலகிலேயே மிகக் கடினமான விலங்கு ‘அன்பு’ மட்டுமே எனக் குறிப்பிட்ட அவர் ,அந்த அன்பு என்ற விலங்கில் இருந்து இறைவனால் கூட விடுபட முடியாது என்பதைச் சமயம் பல இடங்களில் உணர்த்தியுள்ளதாகக் கூறினார்.
அர்த்தநாரீஸ்வரர் வழிபாடும் பதிக முறையும்
தம்பதியரிடையே தேவையின்றி ஏற்படும் தினசரிச் சண்டைகள் மற்றும் மூன்றாம் நபர்களால் உருவாகும் குடும்பப் பிரச்சினைகளைத் தீர்க்கும் வழிபாட்டு முறைகளை அவர் விவரித்தார்.
வழிபாட்டு முறை:
குடும்ப ஒற்றுமைக்கு முதற்கண் குலதெய்வத்தை வழிபட வேண்டும். அதனைத் தொடர்ந்து ,சுவாமியும் அம்பாளும் இணைந்து சுயம்பு மூர்த்தமாகக் காட்சியளிக்கும் திருச்செங்கோடு திருத்தலத்து அர்த்தநாரீஸ்வரப் பெருமானை (செங்கோட்டு நாதர்) வழிபட வேண்டும்.
திருச்செங்கோடு திருத்தலத்திற்கு நேரில் செல்ல இயலாதவர்கள் ,தாங்கள் இருக்கும் இடத்திலிருந்தே அர்த்தநாரீஸ்வரரை மனதார நினைத்து ,நெய்விளக்கேற்றி பதிகங்களைப் பாராயணம் செய்யலாம். தங்களுக்குள் பிணக்குகள் உள்ள தம்பதியர் மட்டுமன்றி ,நீதிமன்ற வழக்கு வரை சென்று பிரிந்து வாழும் தங்களின் பிள்ளைகள் ,உடன்பிறந்தவர்கள் என யாருடைய நல்வாழ்விற்காகவும் மற்றவர்கள் இந்த வழிபாட்டை மேற்கொள்ளலாம் என்று அவர் தெளிவுபடுத்தினார்.
திருநெறிய தமிழ் பதிகங்கள்
இல்லற ஒற்றுமைக்காகப் பாராயணம் செய்ய வேண்டிய இரண்டு முக்கிய பதிகங்களை அவர் விரிவாகப் படித்துக் காட்டினார். முதலாவதாக ,திருஞானசம்பந்தப் பெருமான் அருளிச்செய்த ‘திருநள்ளாறு பதிகம்’ (மண்ணில் நல்லவண்ணம் வாழலாம்):
மண்ணின் நல்ல வண்ணம் வாழலாம் வைகலும்
எண்ணின் நல்ல கதிக்கு யாதுமோர் குறைவில்லை
கண்ணின்நல் அகுதுரும் கழுமல வளர்நகர்
பெண்ணின் நல்லாளோடும் பெருந்தகை இருந்ததே
இறைவன் இறைவியோடு இணைந்து இருந்து அருள்செய்வதை உணர்த்தும் இப்பதித்தின் முதல் வரியே ,மனிதர்கள் பூமியில் மிகச் சிறப்பாக வாழ முடியும் என்ற ஆணித்தரமான நம்பிக்கையை வழங்குகிறது.
இதனைத் தொடர்ந்து ,அருணகிரிநாத சுவாமிகள் அருளிய திருப்புகழ் பாடலையும் அவர் பாராயணம் செய்தார்:
காவி யுடுத்துந் தாழ்சடை வைத்துங் காடுகள் புக்குந் தடுமாறிக்
காய்கனி துய்த்துங் காயமொ றுத்துங் காசினி முற்றுந் திரியாதே சீவ னொடுக்கம் பூத வொடுக்கம் தேற வுதிக்கும் பரஞான
தீப விளக்கங் காண எனக்குன் சீதள பத்மந் தருவாயே
பாவ நிறத்தின் தாருக வர்க்கம் பாழ்பட வுக்ரந் தருவீரா
பாணிகள் கொட்டும் பேய்கள் பிதற்றும்
பாடலை மெச்சுங் கதிர்வேலா ..
தூவிகள் நிற்குஞ் சாலி வளைக்குஞ்
சோலை சிறக்கும் புலியூரா
சூரர் மிகக்கொண் டாட நடிக்குந்
தோகை நடத்தும் பெருமாளே!
நேரமின்மை காரணமாக இந்த இரண்டில் ஏதேனும் ஒன்றைப் படித்தாலும் ,வழிபாட்டிற்கெனத் தனியாகச் சிறிது நேரத்தைச் செலவிட்டு ,முழு நம்பிக்கையுடன் பொறுமையாகப் பிரார்த்தனை செய்யும்போது ,பிரிந்துபோன குடும்ப மகிழ்ச்சி நிச்சயம் மீண்டும் திரும்பக் கிடைக்கும் என்று தேசமங்கையற்கரசி உறுதியளித்தார்.
