திண்டிவனம் ,ஜூன் 14 : அதிமுக தலைமைக்கு எதிராக அக்கட்சியின் மூத்த தலைவரும் முன்னாள் அமைச்சருமான சி.வி. சண்முகம் திண்டிவனத்தில் இன்று கடுமையான விமர்சனங்களை முன்வைத்துள்ளார். சமீபத்திய தேர்தல் தோல்விகள் மற்றும் கட்சியின் தற்போதைய செயல்பாடுகள் குறித்து செய்தியாளர்களிடம் பேசிய அவர் ,அதிமுகவின் தற்போதைய நிலையை மிக வெளிப்படையாக சாடினார்.
தேர்தலில் அதிமுக சந்தித்த தொடர் தோல்விகளுக்கான காரணங்களை அடிமட்டத் தொண்டர்கள் வரை அனைவரும் உணர்ந்துள்ள போதிலும் ,கட்சியின் பொதுச்செயலாளர் எடப்பாடி பழனிசாமி அதனை இன்னும் உணராமல் இருப்பது வேதனையளிப்பதாக அவர் தெரிவித்தார். திமுகவுடன் கூட்டணி வைப்பது குறித்து திட்டமிடப்பட்ட போதே ,அதிமுக தனது தனித்துவத்தையும் சுயத்தையும் இழந்துவிட்டதாகக் குறிப்பிட்ட அவர் ,இந்த தவறான அணுகுமுறைகளால் கட்சியின் மூத்த நிர்வாகிகள் கடும் அதிருப்தியில் இருப்பதை சுட்டிக்காட்டினார்.
ரசிகர்களின் கருத்து கேட்டு அரசியல் பயணத்தை விரைவில் அறிவிப்பேன்: நடிகர் ராகவா லாரன்ஸ் பேட்டி
கட்சிக்காக நீண்ட காலம் உழைத்தவர்களும் ,சொந்தப் பணத்தைச் செலவு செய்து களப்பணியாற்றியவர்களும் தற்போதைய தலைமையின் போக்கினால் மிகுந்த வேதனையுடன் வெளியேறி வருகின்றனர். அவ்வாறு மனவருத்தத்துடன் கட்சியை விட்டு வெளியேறுபவர்களை ‘துரோகிகள்’ என்று முத்திரை குத்துவது எந்த விதத்தில் நியாயம் என்று அவர் கேள்வி எழுப்பினார். வரலாற்றுச் சான்றுகளை முன்வைத்த சி.வி. சண்முகம் ,திமுகவில் அண்ணாவும் கருணாநிதியும் முதலமைச்சர் நாற்காலியில் அமர்ந்ததற்கு எம்.ஜி.ஆர் தான் மிக முக்கியக் காரணம் என்பதை நினைவு கூர்ந்தார். பின்னர் ,திமுகவிலிருந்து எம்.ஜி.ஆர் விலகியதால் அவர் துரோகி ஆகிவிட்டாரா என்றும் அவர் அடுக்கடுக்கான கேள்விகளை எழுப்பினார்.
அதிமுகவின் தற்போதைய தலைமை முற்றிலும் சர்வாதிகார போக்குடன் நடந்து கொள்கிறது என்ற மிக முக்கியமான குற்றச்சாட்டை அவர் முன்வைத்தார். வட மாவட்டங்களில் அதிமுக கடந்த காலங்களில் பெற்ற வெற்றிகள் குறித்த யதார்த்த நிலையை விளக்கிய அவர் ,பாமகவுடன் கூட்டணி வைக்காமல் இருந்திருந்தால் வட மாவட்டங்களில் வெறும் ஏழு அல்லது எட்டு தொகுதிகளில் மட்டுமே அதிமுக வெற்றி பெற்றிருக்க முடியும் என்று புள்ளிவிவரங்களின் அடிப்படையில் பேசினார்.
தற்போதைய சூழலில் அதிமுக ஒரு சீட்டுக்கட்டைப் போல மிக வேகமாக சரிந்து கொண்டிருக்கிறது. தொண்டர்களால் ,தொண்டர்களுக்காக உருவாக்கப்பட்ட ஒரு மாபெரும் பேரியக்கம் இன்று ஒரு குறிப்பிட்ட குடும்பத்தின் பிடிக்குள் சிக்கித் தவிக்கிறது. தனது மகனை அரசியலுக்குள் கொண்டு வருவதற்காக எடப்பாடி பழனிசாமி பல்வேறு நாடகங்களை அரங்கேற்றி வருவதாக அவர் பகிரங்கமாகக் குற்றம் சாட்டினார்.
கட்சியின் தலைமை தனது தவறுகளைத் திருத்திக் கொள்ள தொடர்ந்து மறுத்து வருகிறது. எடப்பாடி பழனிசாமியைச் சுற்றி எப்போதும் ‘ஆமாம் சாமி’ போடும் ஒரு சுயநலக் கூட்டம் மட்டுமே சூழ்ந்திருக்கிறது. இந்த கூட்டம் கட்சியின் உண்மையான நிலவரத்தை அவரிடம் கொண்டு சேர்ப்பதில்லை. தேர்தலில் ஏற்பட்ட மிக மோசமான தோல்விகளுக்குப் பொறுப்பேற்க எடப்பாடி பழனிசாமி தொடர்ந்து மறுத்து வருகிறார்.
கட்சியில் இருந்து தொண்டர்களும் முக்கிய நிர்வாகிகளும் தொடர்ந்து வெளியேறுவதை தலைமை உடனடியாகத் தடுத்து நிறுத்த வேண்டும். அதற்கு முதலில் தேர்தலில் அதிமுக தோல்வி அடைந்ததற்கான உண்மையான காரணங்களை ஆராய வேண்டும். கள நிலவரத்தையும் உண்மை நிலைமையையும் எடப்பாடி பழனிசாமி இனியாவது புரிந்து கொள்ள வேண்டும். கட்சியின் வளர்ச்சிக்காக உண்மைகளைப் பேசும் நாங்கள் ஒன்றும் தலைமையின் விரோதிகள் கிடையாது என்று தெரிவித்த அவர் ,தவறைச் சுட்டிக்காட்டுபவர்களை எதிரியாகப் பார்க்கும் போக்கை கைவிட வேண்டும் என்றார்.
தேர்தல் தோல்வி குறித்தும் கட்சியின் எதிர்காலம் குறித்தும் விவாதிக்க அதிமுக பொதுக்குழு கூட்டத்தைக் கூட்டி விரிவான ஆலோசனை நடத்த எடப்பாடி பழனிசாமி ஏன் தயங்குகிறார் என்ற கேள்வியை அவர் எழுப்பினார். ஒருவேளை தற்போதைய சூழலில் அதிமுக பொதுக்குழுவைக் கூட்ட முடியாத நிலை இருந்தால் ,அவசரமாக கட்சியின் செயற்குழுவையாவது கூட்டி விவாதிக்க வேண்டும் என்று அவர் வலியுறுத்தினார். தொண்டர்களின் உழைப்பால் உயர்ந்த இந்த இயக்கம் ,ஒரு குடும்பத்தின் பிடிக்குள் சென்று அழிந்துவிடக் கூடாது என்பதில் தாங்கள் உறுதியாக இருப்பதாக சி.வி. சண்முகம் தனது பேட்டியில் தெரிவித்தார்.
