தஞ்சை ரெகுநாதபுரம் அரசு கல்லூரி அருகே டாஸ்மாக் கடை: அகற்ற கோரி மனு
தஞ்சாவூர், மே 18: தஞ்சாவூர் மாவட்டம் பாபநாசம் தாலுக்காவுக்கு உட்பட்ட நெடுந்தெரு அருகேயுள்ள ரெகுநாதபுரம் கிராமத்தில், அரசு தொழில்நுட்பக் கல்லூரி அருகே செயல்பட்டு வரும் டாஸ்மாக் மதுபான கடையை உடனடியாக அகற்ற வேண்டும் என்ற கோரிக்கை மீண்டும் வலுப்பெற்றுள்ளது.கடந்த 10 ஆண்டுகளுக்கும் மேலாக இந்த கோரிக்கையை முன்வைத்து தொடர் முயற்சிகளை மேற்கொண்டு வரும் அந்த கிராம மக்கள், தற்போது தஞ்சாவூர் மாவட்ட ஆட்சியரை நேரில் சந்தித்து தங்களின் கோரிக்கை மனுவை அளித்துள்ளனர்.
சுமார் இரண்டாயிரத்திற்கும் மேற்பட்ட மக்கள் வசிக்கும் இந்த ரெகுநாதபுரம் கிராமத்தில் அரசு பல்வகை தொழில்நுட்பக் கல்லூரி இயங்கி வருகிறது.இந்த கல்வி நிறுவனத்தில் தற்பொழுது 800-க்கும் மேற்பட்ட மாணவ, மாணவிகள் பயின்று வருகின்றனர்.ஆனால் இத்தகைய கல்வி நிலையத்திற்கு மிக அருகிலேயே டாஸ்மாக் மதுபான கடை செயல்பட்டு வருவதாக கிராம மக்கள் தரப்பில் குற்றம்சாட்டப்படுகிறது.கல்லூரிக்கு செல்லும் மாணவ, மாணவிகள், பொதுமக்கள் மற்றும் பெண்கள் என அனைத்து தரப்பினரும் தினசரி தங்களின் தேவைகளுக்காக இந்த மதுபான கடையை கடந்து தான் செல்ல வேண்டிய கட்டாய நிலை நீடிக்கிறது.குறிப்பாக காலை மற்றும் மாலை நேரங்களில் இந்த பகுதியில் மதுபோதையில் இருக்கும் நபர்களின் நடமாட்டம் அதிகமாக இருப்பதால் தங்களுக்கு பாதுகாப்பற்ற சூழலும் அச்சமும் நிலவுவதாக அப்பகுதி மக்கள் தெரிவிக்கின்றனர்.
சிவகங்கை ஜல்ஜீவன் திட்டம் சர்ச்சை: சாலை சேதம், குடிநீர் தாமதம் எதிர்த்து பொதுமக்கள் மறியல் போராட்டம்
மேலும் இந்த டாஸ்மாக் கடையின் பெயர் பலகையிலேயே உரிய பதிவு எண் மற்றும் ஊர் பெயர் ஆகியவை தெளிவாக குறிப்பிடப்படவில்லை என்று பொதுமக்கள் சுட்டிக்காட்டுகின்றனர்.இதனால் இந்த கடையின் நிர்வாக நடவடிக்கைகள் குறித்தும் தங்களுக்கு சந்தேகம் எழுந்துள்ளதாக அவர்கள் கூறுகின்றனர்.கல்வி கற்கும் வயதில் இருக்கும் இளைஞர்கள் தினமும் தங்களின் கல்வி நிறுவனத்தின் அருகிலேயே மதுக்கடையைப் பார்க்கும் சூழ்நிலை இருப்பதால் அது அவர்களின் மனநிலையிலும் சமூக வாழ்விலும் தேவையற்ற பாதிப்புகளை ஏற்படுத்தும் அபாயம் உள்ளதாக கிராம மக்கள் வேதனை தெரிவிக்கின்றனர்.மாணவர்களுக்கு மத்தியில் குடிப்பழக்கம் போன்ற தவறான பழக்கவழக்கங்கள் உருவாகாமல் தடுக்கும் வகையில் இந்த கடையை இங்கிருந்து உடனடியாக அகற்ற வேண்டும் என்பது அவர்களின் முக்கிய கோரிக்கையாக உள்ளது.
மறுபுறம் இந்த டாஸ்மாக் கலாசாரம் தங்களின் வாழ்வாதாரத்தை நேரடியாகப் பாதிப்பதாக ரெகுநாதபுரம் கிராமத்தைச் சேர்ந்த பெண்கள் தெரிவிக்கின்றனர்.குடும்பத்தினர் அன்றாடம் வேலைக்குச் சென்று கஷ்டப்பட்டு சம்பாதிக்கும் பணம் பெரும்பாலும் இந்த மதுக்கடையிலேயே செலவாகிவிடுவதாக அவர்கள் கண்ணீர் மல்கக் கூறுகின்றனர்.அதிக அளவில் மது அருந்தும் பழக்கத்தால் தங்களின் கிராமத்தில் பலர் அடுத்தடுத்து உடல்நலக்குறைவால் உயிரிழந்துள்ளதாகவும் இதனால் பல பெண்கள் இளம் வயதிலேயே கணவனை இழந்து விதவைகளாக வாழும் அவல நிலை உருவாகியுள்ளதாகவும் அவர்கள் தங்களின் ஆதங்கத்தை வெளிப்படுத்தியுள்ளனர்.இந்த ஒட்டுமொத்தப் பிரச்சனையும் தங்களின் குடும்பப் பொருளாதாரத்தையும் கிராமத்தின் சமூக அமைப்பையும் கடுமையாகச் சீர்குலைத்து வருவதாக மக்கள் கவலை தெரிவிக்கின்றனர்.
இந்த மதுக்கடையின் செயல்பாடானது சமூக ரீதியாகவும் தங்களுக்குப் பெரும் பின்னடைவை ஏற்படுத்தி வருவதாக கிராம மக்கள் மேலும் குற்றஞ்சாட்டுகின்றனர்.தங்கள் கிராமத்தில் டாஸ்மாக் கடை இயங்கி வருவதைக் காரணம் காட்டி வெளியூரிலிருந்து தங்களுக்குப் பெண் கொடுப்பதற்கும் அல்லது மாப்பிள்ளை எடுப்பதற்கும் மக்கள் தயங்கும் நிலை ஏற்பட்டுள்ளதாகவும் இதனால் கிராமத்தின் சமூக மதிப்பும் மரியாதையும் பாதிக்கப்படுவதாகவும் அவர்கள் கூறுகின்றனர்.
இந்தச் சூழலில்தான் கிராம மக்கள் அனைவரும் ஒன்றிணைந்து தஞ்சாவூர் மாவட்ட ஆட்சியரை நேரில் சந்தித்து தங்களின் நியாயமான கோரிக்கைகளை விளக்கி மனு அளித்துள்ளனர்.தமிழகத்தின் பல்வேறு பகுதிகளில் பள்ளி, கல்லூரி மற்றும் மக்கள் குடியிருப்பு பகுதிகளுக்கு அருகே விதிமுறைகளை மீறி செயல்பட்டு வரும் டாஸ்மாக் கடைகள் நீதிமன்ற உத்தரவுகளின்படியும் மக்கள் போராட்டங்களின் மூலமும் அகற்றப்பட்டு வரும் நிலையில் ரெகுநாதபுரத்திலும் மாவட்ட நிர்வாகம் உடனடி நடவடிக்கை எடுக்க வேண்டும் என அவர்கள் வலியுறுத்தியுள்ளனர்.குறிப்பாக கல்லூரி மாணவ, மாணவிகள் மற்றும் பெண்களின் பாதுகாப்பைக் கருத்தில் கொண்டு, இந்த டாஸ்மாக் கடையை தற்போதைய இடத்திலிருந்து வேறு பகுதிக்கு மாற்றிட வேண்டும் என்று அந்த மனுவில் சுட்டிக்காட்டப்பட்டுள்ளது.
கடந்த சில ஆண்டுகளாகவே தமிழகத்தின் பல்வேறு மாவட்டங்களில் பள்ளி, கல்லூரி, வழிபாட்டுத் தலங்கள் மற்றும் மக்கள் குடியிருப்பு பகுதிகள் அருகே உள்ள மதுக்கடைகளை அகற்ற வேண்டும் என்ற கோரிக்கைகளுடன் பொதுமக்கள் நடத்தும் போராட்டங்கள் அதிகரித்து வருகின்றன.அந்த வரிசையில், ரெகுநாதபுரம் கிராம மக்களின் இந்த 10 ஆண்டுகாலப் போராட்டமும் தற்பொழுது சமூக வலைதளங்கள் மற்றும் பொதுவெளியில் பெரும் கவனத்தைப் பெற்றுள்ளது.
ரெகுநாதபுரம் கிராமத்தில் எழுந்துள்ள இந்த டாஸ்மாக் எதிர்ப்பு விவகாரமானது ஒரு சாதாரண உள்ளூர் பிரச்சனை மட்டுமல்லாமல், தமிழகத்தில் மதுக்கடைகள் அமைக்கப்படும் முறை, சமூகப் பாதுகாப்பு, பெண்கள் நலன் மற்றும் இளந்தலைமுறையினரின் எதிர்காலம் குறித்து நீண்டகாலமாக நிலவி வரும் பொதுமக்களின் ஒட்டுமொத்த கவலையின் வெளிப்பாடாகவே பார்க்கப்படுகிறது.கல்லூரி மற்றும் பள்ளி பகுதிகளுக்கு அருகே மதுக்கடைகள் செயல்படுவது கல்விச் சூழலையே நேரடியாகப் பாதிக்கக்கூடிய விஷயம் என்று கல்வியாளர்களும் தொடர்ந்து எச்சரித்து வருகின்றனர்.குடும்பப் பொருளாதாரம் சீர்குலைவது, பெண்களுக்கான பாதுகாப்புச் சிக்கல்கள் மற்றும் இளைஞர்களின் நல்வாழ்வு பாதிப்பு போன்ற பல சமூக விளைவுகள் இந்த விவகாரத்துடன் இணைந்துள்ளதால், கிராம மக்களின் இந்த நீண்டநாள் கோரிக்கைக்கு மாவட்ட நிர்வாகமும் அரசும் தற்பொழுது என்ன மாதிரியான நடவடிக்கையை எடுக்கப் போகிறது என்பதைப் பொறுத்திருந்துதான் பார்க்க வேண்டும்.
