சென்னை , ஏப்ரல் 11 : தமிழக சட்டப்பேரவைத் தேர்தல் களம் சூடுபிடித்துள்ள நிலையில் சென்னை மாநகர காவல் துறையில் மிக முக்கிய நிர்வாக மாற்றமாக சென்னை பெருநகர காவல் ஆணையர் ஏ அருண் அதிரடியாக மாற்றப்பட்டு புதிய ஆணையராக கூடுதல் காவல் இயக்குநர் அபின் தினேஷ் மோடக் நியமிக்கப்பட்டுள்ளார். இந்திய தேர்தல் ஆணையம் பிறப்பித்துள்ள இந்த அதிரடி உத்தரவு தமிழக அரசியல் மற்றும் நிர்வாக வட்டாரங்களில் பெரும் கவனத்தைப் பெற்றுள்ளது.
தேர்தல் நடத்தை விதிகள் அமலில் இருக்கும் காலங்களில் சட்டம் ஒழுங்கை நிலைநாட்டுவதிலும் நடுநிலையான சூழலை உருவாக்குவதிலும் முக்கியப் பொறுப்புகளில் உள்ள அதிகாரிகளை இடமாற்றம் செய்வது தேர்தல் ஆணையத்தின் வழக்கமான நடைமுறையாகும். அந்த வகையில் தமிழகத்தின் மிக முக்கிய நிர்வாக மையமான சென்னை மாநகரத்தின் சட்டம் ஒழுங்கு பாதுகாப்பை உறுதி செய்யும் நோக்கில் இந்த நடவடிக்கை எடுக்கப்பட்டுள்ளது. தேர்தல் முடியும் வரை ஏ அருண் அவர்களுக்கு தேர்தல் தொடர்பான எந்தப் பணிகளும் வழங்கப்படக் கூடாது என்றும் தேர்தல் ஆணையம் தனது உத்தரவில் திட்டவட்டமாகக் குறிப்பிட்டுள்ளது.
தலைமைச் செயலாளர் மாற்றம்: முருகானந்தத்தை மீண்டும் நியமிக்க திமுக கோரிக்கை
புதிய கமிஷனராகப் பொறுப்பேற்றுள்ள 1997ஆம் ஆண்டு கேடரின் ஐபிஎஸ் அதிகாரியான அபின் தினேஷ் மோடக் காவல் துறையில் நீண்ட நெடிய அனுபவம் கொண்டவர். சட்டம் ஒழுங்கு பராமரிப்பிலும் குற்றத் தடுப்பு நடவடிக்கைகளிலும் திறம்படச் செயல்படக்கூடியவர் என்ற பெயரைப் பெற்றவர். இதற்கு முன்னர் தாம்பரம் மாநகர காவல் ஆணையராகவும் மாநில குற்ற ஆவணக் காப்பகம் மற்றும் பொருளாதாரக் குற்றப் பிரிவின் கூடுதல் காவல் இயக்குநராகவும் பணியாற்றிப் பல முக்கிய வழக்குகளைக் கையாண்ட அனுபவம் இவருக்கு உண்டு.
சென்னை மாநகரம் தமிழகத்தின் தலைநகரமாகவும் ஒட்டுமொத்த அரசியல் மற்றும் வர்த்தக நடவடிக்கைகளின் மையமாகவும் திகழ்வதால் இங்கு தேர்தல் காலப் பாதுகாப்பு என்பது எப்போதும் சவாலான ஒன்றாகவே பார்க்கப்படுகிறது. தலைநகரில் உள்ள 24 சட்டப்பேரவைத் தொகுதிகளுக்கு உட்பட்ட வாக்குச்சாவடிகளின் பாதுகாப்பு பொதுமக்களின் அமைதியான வாக்குப்பதிவு மற்றும் அரசியல் கட்சிகளின் கூட்டங்களை நெறிப்படுத்துவது போன்ற சவாலான பொறுப்புகள் புதிய ஆணையர் முன் உள்ளன. பதவியேற்ற உடனே சட்டம் ஒழுங்கு நிலவரம் மற்றும் தேர்தல் பாதுகாப்பு ஏற்பாடுகள் குறித்து அவர் அதிகாரிகளுடன் ஆலோசனைகளைத் தொடங்கியுள்ளார்.
தலைநகரில் ஏற்பட்டுள்ள இந்த அதிரடி மாற்றம் தென் மாவட்டங்களான திருநெல்வேலி தூத்துக்குடி தென்காசி மற்றும் கன்னியாகுமரி உள்ளிட்ட தமிழகத்தின் பிற பகுதிகளிலும் சட்டம் ஒழுங்கு கண்காணிப்பை தீவிரப்படுத்த தூண்டுகோலாக இருக்கும் என மூத்த அதிகாரிகள் கருதுகின்றனர். தேர்தல் பிரச்சாரங்களுக்காக தென் மாவட்டங்களில் இருந்து சென்னை நோக்கி வரும் அரசியல் பிரமுகர்கள் மற்றும் தொண்டர்களின் நடமாட்டம் அதிகரிக்கும் என்பதால் சென்னை எல்லையோர சோதனைச் சாவடிகளில் கண்காணிப்பு பல மடங்கு அதிகரிக்கப்பட்டுள்ளது.
