திருநெல்வேலி ,ஜூன் 18 : திருநெல்வேலி: அம்பாசமுத்திரம் சட்டமன்றத் தொகுதிக்கு இடைத்தேர்தல் நடைபெற உள்ளதை முன்னிட்டு,நெல்லை வட்டாட்சியர் அலுவலக வளாகத்தில் உள்ள கிடங்கில் வைக்கப்பட்டுள்ள 2,960 மின்னணு வாக்குப்பதிவு இயந்திரங்களைச் சரிபார்க்கும் பணி மாவட்ட ஆட்சியர் ஆனந்த் மோகன் தலைமையில் இன்று தொடங்கியது. அங்கீகரிக்கப்பட்ட அரசியல் கட்சிகளின் பிரதிநிதிகள் முன்னிலையில் இப்பணிகள் முறைப்படி துவக்கி வைக்கப்பட்டன.
நெல்லை மாவட்டத்தின் முக்கியத் தொகுதிகளில் ஒன்றான அம்பாசமுத்திரம் சட்டமன்றத் தொகுதி உறுப்பினராக இருந்த இசக்கி சுப்பையா,அண்மையில் தனது பதவியை ராஜினாமா செய்தார். இதனைத் தொடர்ந்து,இந்தியத் தேர்தல் ஆணையத்தால் இத்தொகுதி காலியானதாக அதிகாரப்பூர்வமாக அறிவிக்கப்பட்டது. மக்கள் பிரதிநிதித்துவச் சட்டத்தின்படி தொகுதி காலியானதாக அறிவிக்கப்பட்ட ஆறு மாதங்களுக்குள் தேர்தல் நடத்தப்பட வேண்டும் என்பதால்,அதற்கான ஆரம்பக்கட்ட ஆயத்தப் பணிகளில் தேர்தல் ஆணையம் தீவிரமாக இறங்கியுள்ளது. இதன் ஒரு பகுதியாக,காலியாக உள்ள சட்டமன்றத் தொகுதிகளில் தேர்தல் நடத்துவதற்குத் தேவையான மின்னணு வாக்குப்பதிவு இயந்திரங்கள் மற்றும் விவிபாட் (VVPAT) கருவிகளைச் சரிபார்த்து தயார் நிலையில் வைக்குமாறு மாவட்டத் தேர்தல் அதிகாரிகளுக்குத் தேர்தல் ஆணையம் உத்தரவிட்டது.
also : கோவில்பட்டி அம்மா உணவகத்தில் மண்டல இயக்குநர் அதிரடி ஆய்வு: பார்சல்களுக்கு தடை
இந்த உத்தரவின் அடிப்படையில்,திருநெல்வேலி வட்டாட்சியர் அலுவலக வளாகத்தில் அமைந்துள்ள வாக்குப்பதிவு இயந்திரங்கள் சேமிப்புக் கிடங்கில் இன்று காலை பணிகள் தொடங்கின. அம்பாசமுத்திரம் சட்டமன்றத் தொகுதி இடைத்தேர்தலுக்குத் தேவைப்படும் இயந்திரங்களின் முதற்கட்டப் பரிசோதனை (First Level Check – FLC) பாரத் ஹெவி எலக்ட்ரிக்கல்ஸ் லிமிடெட் (BHEL) நிறுவனத்தைச் சேர்ந்த தகுதிவாய்ந்த பொறியாளர்கள் மூலம் மேற்கொள்ளப்பட்டு வருகிறது.
அம்பாசமுத்திரம் சட்டமன்றத் தொகுதியைப் பொறுத்தவரை மொத்தம் 321 வாக்குச்சாவடிகள் உள்ளன. இந்த வாக்குச்சாவடிகளில் பயன்படுத்துவதற்காக,கடந்த சட்டமன்றத் தேர்தலின் போது பயன்படுத்தப்படாத 1,139 வாக்குப்பதிவு இயந்திரங்கள் (Balloting Units),626 கட்டுப்பாட்டு இயந்திரங்கள் (Control Units) மற்றும் 1,19 விவிபாட் (VVPAT) கருவிகள் என மொத்தம் 2,960 இயந்திரங்கள் தற்போது சரிபார்ப்புப் பணிக்கு உட்படுத்தப்பட்டுள்ளன. மாவட்ட ஆட்சித் தலைவர் ஆனந்த் மோகன்,அங்கீகரிக்கப்பட்ட அனைத்து அரசியல் கட்சிகளின் பிரதிநிதிகள் முன்னிலையில் இந்த சரிபார்ப்புப் பணியைத் தொடங்கி வைத்து,கிடங்கின் பாதுகாப்பு மற்றும் ஆய்வின் வெளிப்படைத்தன்மையை உறுதி செய்தார்.
வாக்குப்பதிவு இயந்திரங்கள் சரிபார்க்கப்படும் பணிகளை நேரில் பார்வையிட்ட பின்னர்,மாவட்ட ஆட்சியர் ஆனந்த் மோகன் செய்தியாளர்களைச் சந்தித்துப் பேசினார். அப்போது அவர்,தேர்தல் ஆணையத்தின் முறையான வழிகாட்டுதல்களின்படி,மின்னணு வாக்குப்பதிவு இயந்திரக் கிடங்கில் பாதுகாப்புடன் வைக்கப்பட்டுள்ள இயந்திரங்கள் அனைத்தும் பெல் (BHEL) நிறுவனத்தின் மென்பொருள் வல்லுநர்கள் மற்றும் பொறியாளர்களின் நேரடி முன்னிலையில் துல்லியமாகப் பரிசோதிக்கப்பட்டு வருவதாகக் குறிப்பிட்டார்.
மேலும்,அம்பாசமுத்திரம் சட்டமன்றத் தொகுதியில் உள்ள 321 வாக்குச்சாவடிகளுக்குத் தேவையான 642 முதன்மை இயந்திரங்கள் உள்ளிட்ட அனைத்துப் பாதுகாப்பு மற்றும் கட்டுப்பாட்டுக் கருவிகளையும் சரிபார்க்கும் பணிகள் அனைத்தும்,வரும் ஜூன் 21-ஆம் தேதிக்குள் முழுமையாக நிறைவடையும் என்று மாவட்ட ஆட்சியர் ஆனந்த் மோகன் அதிகாரப்பூர்வமாகத் தெரிவித்தார். அரசியல் கட்சிப் பிரதிநிதிகளின் முன்னிலையில் இப்பணிகள் சனிக்கிழமை வரை தொடர்ந்து நடைபெற உள்ளதால்,வட்டாட்சியர் அலுவலக வளாகத்தில் பலத்த போலீஸ் பாதுகாப்பும் போடப்பட்டுள்ளது.
