சிறப்பு செய்தி , ஜூன் 10 : மேற்காசிய பிராந்தியத்தில் தொடர்ந்து நீடித்து வரும் தீவிரப் போர் பதற்றங்கள் மற்றும் அண்டை நாடுகளான சீனா, பாகிஸ்தான் எல்லையில் ஏற்பட்டுள்ள பாதுகாப்பு அச்சுறுத்தல்களுக்கு மத்தியில் இந்தியா தனது அணு ஆயுத மேலாண்மை வியூகத்தில் மிக முக்கிய நடைமுறை மாற்றங்களை மேற்கொண்டுள்ளதாக ஸ்டாக்ஹோம் சர்வதேச அமைதி ஆராய்ச்சி நிறுவனம் (SIPRI) தனது புதிய அறிக்கையில் தெரிவித்துள்ளது.
சர்வதேச அளவில் ஆயுதக் குறைப்பு மற்றும் பாதுகாப்பு விவகாரங்களை ஆய்வு செய்யும் இந்த புகழ்பெற்ற அமைப்பின் கூற்றுப்படி வழக்கமாக அணு ஆயுதக் கொள்கைகளில் இந்தியா பின்பற்றும் சில மரபார்ந்த பாதுகாப்பு நடைமுறைகள் தற்போதைய பிராந்திய சூழலுக்கு ஏற்ப தற்காலிகமாக மாற்றியமைக்கப்பட்டுள்ளன. பொதுவாக இந்தியாவில் அணு ஆயுதங்களின் மையப் பகுதியான ‘கோர்’ (Core) எனப்படும் பகுதி மற்றும் ஏவுகணைகள் ஆகியவை தனித்தனியாக பிரிக்கப்பட்டு மிகுந்த பாதுகாப்புடன் வெவ்வேறு இடங்களில் வைக்கப்பட்டிருப்பதுதான் வழக்கமான நடைமுறையாகும். ஆனால் அண்மைக்கால பாதுகாப்பு அச்சுறுத்தல்களைக் கருத்தில் கொண்டு முதல் முறையாக இந்தியாவின் 12 அணு ஆயுதங்கள் ஏவுகணைகளுடன் நேரடியாகப் பொருத்தப்பட்டு எந்நேரமும் ஏவுவதற்கு ஏதுவான தயார் நிலையில் வைக்கப்பட்டுள்ளதாக அந்த அறிக்கையில் குறிப்பிடப்பட்டுள்ளது.
Also read : பிரதமர் விருந்தில் முதல்வர் விஜய்: டெல்லியில் கூட்டணித் தலைவர்களுடன் முக்கிய சந்திப்பு
மோடி ஆட்சியின் மல்டிபேக்கர் பங்குகள் : ₹1 லட்சம் முதலீடு ₹2 கோடியாக மாறியதா? 206X லாபம்!
இந்தியாவின் அணு ஆயுதப் பயன்பாட்டு வரலாற்றில் இத்தகைய அதிரடி நடவடிக்கை மேற்கொள்ளப்படுவது இதுவே முதல் முறை என்று பாதுகாப்புத்துறை வல்லுநர்கள் சுட்டிக்காட்டுகின்றனர். இதுமட்டுமன்றி கடந்த ஓராண்டில் இந்தியாவின் ஒட்டுமொத்த அணு ஆயுதக் கையிருப்பின் அளவு கணிசமாக அதிகரித்துள்ளதாகவும் சிப்ரி அமைப்பு கணக்கிட்டுள்ளது.
விண்ணில் இருந்து ஏவப்படும் ஏவுகணைகள் மட்டுமன்றி கடலுக்கடியில் இருந்து தாக்கும் இந்தியாவின் வலிமையும் தற்போதைய சூழலில் பலப்படுத்தப்பட்டுள்ளது. குறிப்பாக இந்திய கடற்படையின் மூலோபாய நீர்மூழ்கிக் கப்பல்களில் உள்ள ஏவுகணைகளில் குறிப்பிட்ட எண்ணிக்கையிலான அணு ஆயுதங்கள் பொருத்தப்பட்டு அவை வழக்கமான ரோந்துப் பணிகளில் ஈடுபடுத்தப்பட்டு வருவதாக இந்த ஆய்வறிக்கை விவரிக்கிறது. இந்த நடவடிக்கை நாட்டின் கடல்சார் பாதுகாப்பை உறுதிப்படுத்துவதிலும், எதிரி நாடுகளின் திடீர் தாக்குதல்களை முறியடிப்பதிலும் மிக முக்கியப் பங்கு வகிக்கும் எனத் தெரிகிறது.
எனினும் இந்தியாவின் அடிப்படை அணு ஆயுதக் கொள்கையான ‘முன்னதாகப் பயன்படுத்தக் கூடாது’ (No First Use – NFU) என்ற தத்துவத்தில் எந்தவித மாற்றமும் செய்யப்படவில்லை என்பதை இந்த அறிக்கை தெளிவுபடுத்துகிறது. அதாவது எந்தவொரு நாட்டின் மீதும் இந்தியா முதன்முதலாக அணு ஆயுதத் தாக்குதலைத் தொடுக்காது என்ற அதன் தார்மீகக் கொள்கை தொடர்ந்து நீடிக்கிறது. அதே வேளையில் நாட்டின் இறையாண்மைக்கு ஏதேனும் அச்சுறுத்தல் ஏற்பட்டாலோ அல்லது எதிரி நாடுகள் தாக்குதல் நடத்தினாலோ, அதற்கு நொடிப் பொழுதும் தாமதிக்காமல் மிகக் கடுமையான பதிலடி கொடுக்கும் வகையில் இந்தியா முழுமையான ஆயத்த நிலையில் இருப்பதை இந்த மாற்றங்கள் வெளிப்படுத்துகின்றன.
அண்டை நாடுகளின் ராணுவப் பெருக்கம் மற்றும் மேற்காசிய பிராந்தியத்தில் மாறிவரும் பூகோள அரசியல் சூழல் ஆகியவையே இந்தியாவின் இந்த தற்காப்பு உத்தி மாற்றத்திற்குக் முதன்மைக் காரணியாகப் பார்க்கப்படுகிறது. சர்வதேச அளவில் பெரும் பரபரப்பை ஏற்படுத்தியுள்ள இந்த விவகாரம் தொடர்பாக இந்திய மத்திய அரசோ அல்லது நாட்டின் பாதுகாப்பு அமைச்சகமோ இதுவரை எந்தவிதமான அதிகாரப்பூர்வ விளக்கத்தையோ அல்லது மறுப்பையோ வெளியிடவில்லை என்பது குறிப்பிடத்தக்கது.
