கடைகளுக்கு நெல்லை மாவட்ட முதன்மை கல்வி அலுவலர் அதிரடி எச்சரிக்கை ; மாவட்டத்தில் பிளஸ்-2 பொதுத்தேர்வு 19,835 மாணவ-மாணவிகள் எழுதியுள்ளனர்.
திருநெல்வேலி – மார்ச் 02, 2026; தமிழகம் முழுவதும் பிளஸ்-2 பொதுத்தேர்வு இன்று தொடங்கியது. நெல்லை மாவட்டத்தில் மொத்தம் 19,835 மாணவ-மாணவிகள் மிகுந்த உற்சாகத்துடன் தேர்வில் பங்கேற்றனர். இதற்காக மாவட்டம் முழுவதும் பலத்த பாதுகாப்பு மற்றும் கண்காணிப்பு ஏற்பாடுகள் செய்யப்பட்டிருந்தன.
73 தேர்வு மையங்கள்
நெல்லை மாவட்டத்தில் மாணவர்களின் வசதிக்காக மொத்தம் 73 தேர்வு மையங்கள் அமைக்கப்பட்டிருந்தன. இதில் 8,791 மாணவர்களும், 11,044 மாணவிகளும் தேர்வு எழுதினர். பள்ளி வாரியாகப் பார்க்கும்போது:
- அரசு மேல்நிலைப் பள்ளிகள்: 28
- அரசு உதவி பெறும் பள்ளிகள்: 38
- மெட்ரிக் பள்ளிகள்: 7
இவை தவிர, தனித்தேர்வர்களுக்காக 10 சிறப்பு மையங்கள் ஒதுக்கப்பட்டிருந்தன.
சிறை கைதிகள் தேர்வு
இந்தத் தேர்வின் சிறப்பம்சமாக, பாளையங்கோட்டை மத்திய சிறைச்சாலை தனி மையமாக மாற்றப்பட்டது. அங்குள்ள சிறை கைதிகள் கல்வி பயின்று, சமூக நீரோட்டத்தில் இணையும் நோக்கில் இன்று ஆர்வத்துடன் பொதுத்தேர்வை எழுதினர். மேலும், 153 மாற்றுத்திறனாளி மாணவர்களுக்குத் துணையாக ‘ஸ்கிரைப்’ (Scribes) எனப்படும் ஆசிரியர்கள் நியமிக்கப்பட்டு, கூடுதல் கால அவகாசமும் வழங்கப்பட்டது.
பறக்கும் படை அதிரடி – ‘பிட்’ பறிமுதல்
தேர்வு முறைகேடுகளைத் தவிர்க்க 150 பேர் கொண்ட பறக்கும் படையினர் தீவிர கண்காணிப்பில் ஈடுபட்டனர். மாவட்ட முதன்மை கல்வி அலுவலர் சிவக்குமார் தலைமையிலான பறக்கும் படையினர் பல்வேறு மையங்களில் அதிரடி ஆய்வு நடத்தினர். அப்போது, தேர்வு அறைக்குள் நுழையும் முன் மாணவர்களைச் சோதனையிட்டதில், சில மாணவர்கள் பிட் அடிக்கும் நோக்கத்தில் ‘மினி ஜெராக்ஸ்’ வைத்திருந்தது கண்டுபிடிக்கப்பட்டு பறிமுதல் செய்யப்பட்டது.
ஜெராக்ஸ் கடைகளுக்கு எச்சரிக்கை
பிட் பேப்பர்களுடன் சிக்கிய மாணவர்களிடம் விசாரணை நடத்தியதில், அவை உள்ளூர் ஜெராக்ஸ் கடைகளில் எடுக்கப்பட்டது தெரியவந்தது. இதையடுத்து, சம்பந்தப்பட்ட ஜெராக்ஸ் கடைகளுக்கு நேரடியாகச் சென்ற கல்வி அதிகாரிகள் கடும் எச்சரிக்கை விடுத்தனர்.
இதுகுறித்து மாவட்ட முதன்மை கல்வி அலுவலர் சிவக்குமார் கூறுகையில்:
“மாவட்டத்தில் உள்ள எந்தவொரு ஜெராக்ஸ் கடையிலும் மாணவர்களுக்குப் பிட் அடிக்க வசதியாக ‘மினி ஜெராக்ஸ்’ போட்டுத் தரக்கூடாது. இதனை மீறி செயல்படும் கடைகள் மீது உரிய விசாரணைக்குப் பிறகு கடுமையான சட்ட நடவடிக்கை எடுக்கப்படும்,” என எச்சரித்தார்.
ரம்ஜான் எதிரொலி மேலப்பாளையம் ஆட்டுச்சந்தையில் ரூ.4 கோடி மதிப்பிலான ஆடுகள் விற்பனை..
